Am wakken i yuɣen tanumi, yal mi ara d-yass waggur n Remḍan, irebraben ssemsaden ajenwi iwakken ad d-sersen rrehba deg yimdanen. Maca, tikkelt-a, iɣallen n laman zgan-asen-d deg ubrid iwakken ad rren talast i txazabiyin n yiminigen n yiḍ. Deg ubrid gar Tubiret d Msila i d-yella ass n lǧemɛa deg yiḍ yiwen n umbaddal n tyita s rṣaṣ gar yiwet n terbaɛt n yimselḥen yellan deg yiwet n tkerrust akked yiɣallen n laman.
Tiyita i yuɣer yirebraben-a qessiḥet imi mmuten di rebɛa yid-sen daxel n tkerrust ideg tecɛel ula d timest, am wakken i yettwajreḥ yiwen n uǧadarmi. Ad d-nesmekti belli taluft-a mačči d tamezwarut segmi yebda waggur n Remḍan, imi iɣallen n laman ṭṭfen deg yimalas yezrin yiwet n tkerrust anda ufan isufar n wučči d wid n usejji. Imdanen yellan deg tkerrust-a mačči d wid yefɣen akka s adrar maca, ɣef leḥsab n yisallen i aɣ-d-yewḍen, imdanen-a qeddcen i yirebraben.
Addud n yiɣallen n laman deg wudem n rrebrab d ayen i d-yeǧǧan akka tura imdanen teddun ladɣa deg yiḍ deg temdinin. Tubiret, d yiwet seg temdinin i yettidiren uḍan am wakken d ass seg lketra n lɣaci i d-irezzun ɣur-s.
S. M.