Igerdan di twilayt n Tizi wezzu, deg ussan-agi n usgenfu iḥuzaten waḍu n unadi ɣef udrim, imi ineggura-agi ad tent-waliḍ ama deg yiberdan neɣ di leswaq yal wa d acu ila yeznuzuy, la ttemyizwiren nutni akked d imeqqranen , ɣer yimukan anda ṭṭuqten yimdanen, akken ad tenz sselɛa-nsen, ad uɣalen di taggra n wass s ixxamen-nsen s lejyub ccuren.
Ma nemslay akked imectaḥ-agi ad d-naf yal wa d acu n uɛekkaz I t-yewwten, wa baba-s ur yelḥiq ara wayeḍ ur t-yesɛi ara maḍi, imi d yemma-s I ittnaɛaben akken ad d-ḥelli talqimt ara ççen. Igerdan -agi ikcem-iten uɣbel n tmeɛict akken ur wwiḍen, deg ussan-agi n waggur n Remḍan ufan lebɣi-nsen, imi ṭṭaqa n yimdanen tetten s wallen, d tagnit akken ad zenzen isafaren n wuççi ladɣa wid I d-yewwan deg uxxam, ama d aɣrum n uḍajin neɣ d Dyul ttaḥwijint tlawin I Lburak, d yisafaren nniḍen :lḥemeé leḥcic n ccerba akked d mɛednus d wayen nniḍen.
Tamsalt-agi n lxudma n warrac ur newwiḍ ara 16 n yiseggasen di leɛmer-nsen, d tin izaden deg wagguren-agi n usgunfu, imi ad naf imdanen yelḥan di leɛmer, sexdamen ineggura-agi berra n leqanun s ssuma rexisen maḍi, imi ayen ila xeddmen ur yeqqim ara deg yisafaren imeéyanen nsaxdam I wuççi kan, ad naf ineggura-agi ttɛebbin ayen ur wumi zmiren , ama d anerfud nyikuja imeqranen n yiguma yemgaraden seg umkan ɣer wayeḍ daxel n leswaq, am akken daɣen ad ten-naf la refden ssiman, leyajur,d wuzzal deg yicanṭiyen, ula deg yiɛarqab n Dellaɛ d ufeggus, ad ten-tafeḍ zzan dina ddaw n yiéenéaren n yiṭij qessiḥen. Ayagi ɣef leḥsab n yimeslayen n yineggura-agi, d taswiɛt I tiḥettmen fell-asen, acku ilaq ad xedmen akken ad sneɣsen di lmeṣruf n wuxxam, ad izmiren ad d-aɣen ayen ara ḥwijen ama i laid tameẓyant, neɣ anekcum ɣer uɣerbaz i d-iteddun. Aɣbel n umeṣruf ass-a yezdi ula d igerdan imecṭaḥ, id ikkan si twaculin inxeṣṣen ur nesɛi ara ttawil akken ad fken I dderya-nsen ayen I ten-iwilmen, ayen I iooan igerdan-agi ad ttuḥermen seg ussan imuras am nutni am tezyiwin-nsen.
Tiɣri I yemḍebbren taɛna temsalt, akken ad skecmen iman-nsen iwallen ad rren tilas I lbaṭel-agi I ttidiren yigerdan di tmurt-nneɣ.
Malika Kebaili