Accueil Tamazight Tacennayt Fatma Chaabi

Udem gar wudmawen

Tacennayt Fatma Chaabi

328

Fatma Chaabi, d tanaẓurt, si zik-is tḥemmel ccna aqdim, tsell aṭas i radyu tis snat, ladɣa tidwilin-nni n ccna. Seg wasmi tella meẓẓiyet, tḥemmel icennayen imeqqranen n teqbaylit, Ccix Lḥesnawi, Sliman Ɛazem, syin akkin dac dac tettaɛraḍ ad tecnu i yiman-is deg uxxam. Ulamma ɣef zik n lḥal i tebda ccna s ṣṣut-is ḥlawen, maca ur tgi ara isurifen ɣer sdat, imi tmugger-d imir ugur n tmetti, yettagin ad tecnu tmeṭṭut (d lɛib). Syin seg useggas n 2016, tebda teqqar aẓawan (lmusiga) n cceɛbi deg Uxxam n yidles Mulud Mɛemmeri n Tizi Uzzu.

Sya ɣer da, tettali-d ɣef usayes deg tmeɣriwin i d-yettilin deg Uxxam-a. Tettekki diɣ deg teliliyin (chorales) i texdem gar n yicennahen, gar-asen Samir Loucif. Tura akka, ha-tt-an la tettheggi i wakken ad tessufeɣ yiwen n album, ideg ara tales ccna i tlata n tezlatin n yicennayen iqbayliyen mucaɛen. Am wakken daɣen i yetturaǧu, sya d afella, ad tessufeɣ tasfift i yiman-is, ma d isefra ad ilin n Ait Djoudi Sadi, i tt-yettɛawanen aṭas deg uḥric-agi n ccna. Ɣer taggara, ad d-nesmekti kan belli, Fatma Chaabi tlul ass n, 25 yennayer 1968, deg Lezzayer Tamaneɣt (Casbah), armi tmeqqer i d-tuɣal ɣer tmurt-is tanaṣlit Rǧawna, acu kan ulamma deg Lezzayer i d-tekkar maca mazal teḥrez tutlayt-is taqbaylit.

Adaoun Abdelghani