Accueil Tamazight Tafugla i usmekti s Mouloud Yarkal

Tafugla i usmekti s Mouloud Yarkal

26

Ass-nni n lǧemɛa yezrin 26/04/2019, tella-d tfuglan n usmekti n umerḥum Mouloud Yarkal, i wumi tettuɣal tejmilt s temsizzelt n ddabex uḍar. Ɣef 8h30 n ssbeḥ, nejmaɛen-d medden d tirni ɣef uẓekka-s, gar yiɛeggalen n twacult-is d yimeddukkal akked yiɛeggalen n ugraw anaddal n Ait Aissa Mimoun, i d-iheggan leqdic-a. Yella-d usersi n tmeqqunt n yijeǧǧigen ɣef uẓekka-s, syin akkin d ddqiqa n tsussmi. Am wakken daɣen i d-llant tnagiyin d waktayen n yimeddukkal-is d twcult-is. Maca, uqbel annect-a, yettili-d ussan-a usiher n waddal, sɣur ugraw n waddal n Ait Aissa Mimoun i gan d tajmilt i umarḥum Yarkal Mouloud, i yellan d ufrin (élu) deg Useqqamu aɣerfan aɣiwan n Ait Aissa Mimoun. Ass-nni n lǧemɛa, 19 yebrir 2019, i tebda temsizzelt n temliliyin n ddabex uḍar n tɣiwant n Ait Aissa Mimoun, i d-yettilin deg unnar aɣiwan yellan deg Tiplakine.

D timsizzelt n temliliyin, ara yeddun ɣef teɣzi n waṭas n wussan, imi aṭas n temliliyin i yellan. Mbeɛd mi i d-tella temlilit n tazwara, ass-nni n lǧemɛa iɛeddan ɣef 17h30 n tmeddit gar snat n trebbuyaɛ-agi: Tarbaɛt n taddart n Tahanouts ( taddart n umerḥum-agi) mgal tin n taddart n Ighil Bouchene (taddart n yimsuddsen). Ttkemmilent temliliyin-agi i d-yettilin yal tameddit n wass ɣef 17h30 n tmeddit deg unnar aɣiwan n Ait Aissa Mimoun. Yetturaǧu sya ar timlilit n taggara, ara d-yilin ass n lexmis, 09 mayyu 2019, ad d-ilint 14 n temliliyin, sya ar imir. Ɣer taggara, ad nesmekti belli Mass Yarkal yewweḍ leɛfu Rebbi ass n, 18 yebrir n useggas yezrin, yeǧǧa-d deffir-s sin warraw-is d ilqaqen.

A. A.