Ass-nni n letnayen, 15/07/2019, i d-iberreḥ lwali n Tbessa s uheggi i temilit tagraɣlant ɣef tlawin timaziɣin, yesɛan azal deg umezruy, gar-asent tagellidt tamaziɣt Dihya akked Tinhinan. Yessenṣeb amaray amatu n Useqqamu Unnig n Timmuzɣa, Si El Hachemi Assad, d imḍebber ara d-yesbedden taseqqamut tussnant ara d-yelhin s uheggi n temlilit-a tameqqrant. Yetturaǧu, ad d-yili usarag agraɣlan gar 28 d 30 cutember i d-iteddun deg Tbessa ɣef uzbu (résistance) n tsednan deg umezruy aqbur n Tefriqt n Ugafa. Ad d-yettwasuddes s tallelt n Tddukkla «Tifastins» n yidles d tmagit n lwilaya n Tbessa ɣer tama n Wammas Aɣelnaw n Tezrawin Tineṭruplujiyin.
Ma ɣef yiswi n temlilit tagraɣlant, yenna-d umaray amatu n Useqqamu Unnig n Timmuzɣa, Si El Hachemi Assad : “Asarag-a ad yettwasuddes i wakken ad d-iwekked ɣef wudmawen n uzbu n tsednan (tilawin) deg umezruy n Tefriqt n Ugafa deg taɣulin yemgaradenˮ. Ikemmel yenn-a-d : “Iswi wis sin n usarag-a, d asebded n tmuɣli tazzayrit ɣef umezruy n Lmeɣreb i uḥraz, d uselmed n wayen i gant tlawin n Tefriqt n Ugafa deg talliyin yemgaraden n umezruy n temnaḍt-aˮ.
Ma si tama-s lwali n Tbessa, Mass Moulati attalah, yuɣal-d deg wawal-is n tazwara ɣef wazal i yettak i Uwanek Azzayri i tgemmi d umezruy akked useḥbier fell-asen. Deg umyaggar-agi agraɣlan, yetturaǧu ad ttekkin deg-s ddeqs n yimussnawen d yisdawanen n umezruy, ara d-yemmeslayen ɣef wazal i sɛant tlawin deg umezruy n Tefriqt n Ugafa, ladɣa azbu-nsen neɣ ibeddi-nsent mgal imnekcamen i d-ikecmern tamurt n tmazɣa.
Gh. A.