Ass-nni n letnayen, 19 deg yebrir 2021, deg yiḍ, i reṣṣan s wudem unṣib sin yisebdaden deg Wat Dwala. Isebdaden n Lounès Matoub akked Imache Amar, llan-d d tajmilt i sin yirgazen-agi n tama n At Dwala deg wass n usfugel n Tefsutin 1980 akked tin n 2001. Aṭas n yimdanen i d-yerzan ɣer din ass-nni n tsunẓut i wakken ad walin i tikkelt tamezwarut isebdanen-agi i texdem tnaẓurt Kenza Abbas n taddart Tala Buẓru i d-yeffɣen seg Uxxam n tẓuriyin icebḥen. I usmekti, leqdic-agi, yella-d s lmendad n tɣiwant n At Dwala, tiddukkla Amar Imache akked Lsas Matoub Lounès.
Aṭas-aya segmi i as-kkren i usenfar, maca yella-d wugur n tedrimt deg ubrid-is, daymi i d-yella leɛḍil, ɣef wakken i d-yenna yiwen seg wid i d-yelhan deg usenfar-agi. I tikkelt tamezwarut, diɣ, ara sbedden asebdad n Matoub Lounès akked Imache Amar deg tmurt-nsen. Xas ulamma ddeqs n yimdanen i iwalan d akken isebdaden-agi ur fkin ara anzi s waṭas ɣer Matoub d Imache, meɛna nnan-d yugar wazal ay sɛan mi akka bedden yisebdaden wala ma ulac maḍi. Tineggura-agi, aṭas n yisebdaden i d-yettilin sya ɣer da deg tmurt n leqbayel. Ama, d imdanen n umezruy, imeɣrasen neɣ d inaẓuren : yal tama, tefka azal i wid-is.
Hocine Moula