Ɣas ma tedda tussna, deg umaḍal, asurif meqqren deg yal aḥric n tudert, ɣas ma wwḍent tɣermiwin n yal agdud ɣer tqacuct s wayen i d-ufrarent i lfayda n talsa, maca assaɣ yellan gar umdan d ugama, d assaɣ lqayen deg umezruy n txelqit. D assaɣ ara idumen i lebdda.
Yal aɣref yesεa amezruy, d cfayat (timektit) imezdayen yezdin agdud. Dɣa ass-a, yewwi-d ɣef yal yiwen ad yeḥṣu s wazal n tgemmi n tɣerma n Yimaziɣen i d-yeǧǧan isem-is deg umezruy. Yiwen useklu yezdin yakk tigeldiwin n yilel agrakal, d netta i ɣer cuddent cfawat timagdayin, d netta i d tamagit n ugdud, wagi d tazemmurt. Tazemmurt, ayen i d-neḥka fell-as drus, ayen i as-nerra d lxir, ur nezmir ad t-id-nebder, sdat wayen i aɣ-icudden ɣur-s, d nettat i d tayemmat i d-yessekkren acḥal d tasuta. Akken i as-yenna Musa n talsa ɣef wassaɣ n ugdud ɣer umezruy-is : “S anda la tettedduḍ ay aḍar? Yenna-as: “S azar”. Ihi ass-a yewwi-d ad nerr ccan i yal abruy n tgemmi, s wayen yak i nezmer, i wakken ad neḥrez tamagit, tazemmurt. Tazemmurt, d agerruj n lebbda, yis-s i d-bnan lejedud tussna deg yal tama, d ayen iwumi qqaren, ass-a, tigemmi, ama deg tussna i icudden ɣer ulqam n uzemmur, d tarrayin-is yemgaraden seg tɣerma ɣer tayeḍ , neɣ d ayen yeεnan tiẓtin n uzemmurt, tussna i icudden ɣer ufras d ucraw. Megren-d Yimaziɣen tussna meqqren deg wassaɣ-nsen d ugama d twenaṭ, ladɣa dg wayen yeεnan aḥric n uzemmur. Dɣa, ula d tafada, tcudd ɣer uḥric n tfellaḥt, tayarza, acraw, alqam d ufras. Tcudd tussna ɣer lɣella n zzit n uzemmur, ladɣa ɣer tɣara: Allalen n ujemaε n zzit n uzemmurt, tisyar n uzemmur. Azal n tzemmurt, icudd, diɣ, ɣer tdamsa n twacult taqbaylit, d nettat i d-yettilin deg lmendad deg yal taswiεt n lḥars.
Ali Zalouk