Karim addad, d yiwen ucennay i ilulen di temnadt n iɛezzugen, yessuffeɣ-d aḍebdi-is amezwaru di taggara n useggas iɛeddan. Deg tdiwennit-a, newwi-d awal ɣef tezlatin yemmxalafen, meɛna tuget deg-sent, tezzint ɣef tayri.
Aɣmis n yimaziɣen: Amek i tebdid ccna?
Karim Addad: Asmi i ibdiɣ mezziyeɣ mliḥ, lliɣ sɛiɣ 14 n ssna, cennuɣ deg Ugraw » Tacrouft Ɛatman « , uɣaleɣ lemdaɣ snitra, syin ḥefḍeɣ amundul deg useggas n 1996. Syin, bdiɣ ttaruɣ isefra deg useggas n 1999.
D acu-ten yisenltal anda i tettafeḍ iman-ik ?
Ttafeɣ iman-iw kan mi ara ttaruɣ ɣef tayri, ulamma ur cukkeɣ ara, ad d-yaweḍ wass anda ara d-aruɣ ɣef wayen-nniḍen. Ttaruɣ ɣef wayen ttḥulfuɣ di tallit-nni, dwayen i ttidireɣ
Mmmeslay-aɣ-d ɣef uḍebsi-ik amezwaru…
Aḍebsi-agi, d amezwaru-inu. Bdiɣ-t εamayen-agi si 2016. Imir, yewwi-iyi-d lhal, ad ḥebseɣ ɣef sebba n lehlak di taɣuct-iw. Qqimeɣ armi d 2018. Syin imi ḥliɣ, uɣaleɣ ɣer unnar, akken ad kemmleɣt. Yeffeɣ-d ass n, 3-12-2018.
Awal tura, ma tebɣiḍ, ɣef yiḍrisen n tezlatin-agi?
Iḍrisen n uḍebsi-agi yakk uriɣ-ten deg useggas n 1999 ar 2000. Asmi bdiɣ asekles, yella wacu i beddleɣ aka, meεna kra n yimeslayen kan i yi-id-ibanen, ilaq ad ttwabeddlen, imir dayen. Dɣa imi i d-nuder abeddel, ladɣa lmusiqat-agi, xedmeɣ-tent yakk asmi lliɣ mezziyeɣ, tagerjumt teǧhed. Aṭas i yi-d-yennan d akken lmusiqat-agi weεrit mliḥ: talint, tsubbunt mliḥ, meεna sawḍeɣ, ccniɣ-tent s uswir-nniḍen.
D anwa acennan uɣur i d-tettagmeḍ?
Mi ara tesleḍ i tezlatin-iw, ad tafeḍ belli aṭas n unadi i yellan. Aṭas n lxedma d laεtab, ama di lmusiga neɣ deg yimeslayen. Ḥemleɣ mlih, ad d-agmeɣ di lbayati aked errasd (tubuε). Ma yella d asmuzget, smenyifeɣ ad ssleɣ akk i yifennanen n leqbayel, labaεda Karim khefaoui aked M’henna Ouzaid .
yella kra i d-tessewjadeḍ akka tura?
Akken i d-nniɣ di tazwara, tizlatin-agi xedmeɣ-tent di tallit n 99 ar 2000. Rniɣ uriɣ tiyiḍ. Ssarmeɣ, ad d-rnuɣ iḍebsiye- nniḍen akken kan i d-msetbaεent. Tibḥirt meqqret, meεna teḥwaǧ aṭas n ttawilat, ama d lwaqt, ama d idrimen. Akken twalaḍ, tesɛeb mliḥ liḥala n ufennan.
Awal n taggara…
Di taggara, ttmenniɣ ad tgerrez tudert n ufennan. Ttmeniɣ, ad d yili lfen zeddigen, tamurt, ad qaεden wussan-is. Ad d-iniɣ tanemmirt i wid ibedden yid-i ɣef uḍebsi-agi, tawacult ifennanen kul yiwen s yism-is, tawacult-iw εzizen. Tanemmirt tameqqrant i kemm a Suhila ɣef leqdic-agi. Tanemmirt i La Dépêche de Kabylie.
Yamani Souhila