Deg wass n segd iεeddan 06 deg wagur n yibrir 2019, i d-tella yiwet n temhelt n usizdeg n tlemmast n tɣiwant n Mεatqa, s ddaw n leεnaya n Useqqamu aɣerfan aɣiwan, s tallelt n yimezdaɣ n Mεatqa akked tddukkla Tadelsant Yennayer n taddart Isebaqqen. Ma d asentel n tigawt, bɣan akka “Ad nessizdget tamdint-nneɣ : Ḥemmeleɣ tamdint-iw, ḥemmleɣ Mεatqa, ad tt-ǧǧeɣ zddiget !”. D yiwet n tigawt s wazal-is i ɣer i d-yessawel uselway n Useqqamu aɣerfan aɣiwan n Mεatqa, Mass Lyes Laguel d tarbaεt-is, anda i d-heggan yakk ttawilat iwatan akken ad d-teddu twiza akken iwata, ladɣa lḥarǧ ameqqren yecban ikumya d tmacinin.
Tella-d tigawt seld iḍumen i izelgen yakk tiɣemmar n temdint, d lexsas meqqren deg umḍan n yixeddamen i d-yelhan s usizdeg deg srabes n tɣiwant n Mεatqa. Tamhelt-agi ihi, tebdda ɣef 9 n tsebḥit seg sdat n Uxxam n tɣiwant, ɣas ma yennehwal lḥal, d ugeffur i d-yewwten s ṭṭaqqa, maca ur qḍiɛen ara layas yimezdaɣ d tddukliwin : xedment tiwizi-agi n usizdeg s lebɣi meqqren, anda i d-jeemεen ugar n 4 n ikamyunen n yiḍumman, ladɣa seg yiguduyen s trawnaṭ i izelgen udem n temdint-agi, d iqarεunen n yiɣisem (boissons alcooliques) i iεemren yakk tiɣemmar n yiberden n tɣiwant. Xedmen yimezdaɣ d tddukliwin iffaden akken ad d-rren taɣiwant d tazeddgant, mebla iḍumman d iguduyen yezelgen udem n tɣiwant. Dɣa akken ineḥsa deg wussan-agi inggura, sdat n tmesbaniyin yemgaraden mgal adabbu amesbaṭli, aṭas n tigawin n usizdeg d ugerrez n tɣiwanin d yizenqan i d-yellan deg tuget n temḍiqin n tmurt n Lezzayer.
Ali Zalouk