Accueil Tamazight Tella-d tmeɣra n ccna

Tallelt i Djerrahi Samy d usmekti n 14 yunyu 2001

Tella-d tmeɣra n ccna

84

Akken kan ara tekcem tsemhuyt n unebdu, ṭṭuqutent tmeɣriwin n ccna i d-yettilin deg waṭas n tamiwin n tmurt n Leqbayel, tuget n tmeɣriwin-a, ttilint-d deg yiḍ.

D tiddukkliwin tidelsanin neɣ d tinmehliwin n yidles i tent-id-yessuddusen deg yiɣerbazen n tuddar neɣ deg yixxamen n yilmeẓyen. Ɣef waṭas n tmental i d-ttilint, ama d tasfugla neɣ d tijmilin. Maca tameɣra i d-yellan deg yiḍ n 14 yunyu iɛeddan deg unnar n Ginduz deg tɣiwant n Yiɣil Ɛli, txulef kra tiyaḍ, acku tamentilt i d-yessemlalen imezdaɣ ad smeḥsen i tezlatin n yinaẓuren i d-yecnan, d tallelt (lemɛawna) i yiwen n yilemẓi amuḍin iwumi qqaren Djerrahi Samy, akken ad as-d-tuɣal tezmert.

D iwiziwen n lxir d tddukkliwin tidelsanin i as-yekkren i ccɣel-a d lmendad, walan tifrat i ujmaɛ n tedrimt ara yekfun amuḍin-a akken ad idawi, tezmer ad d-tekk seg tmeɣra n ccna. Dɣa, ssuddsen-tt-id akken ilaq deg tegnatin igerrzen.

Ula d icennayen i d-yellan deg usiher s wazal-nsen, usan-d s lferḥ imi ẓran ɣef uqcic-a yuḍnen ara d-tili tmeɣra-a. D icennayen yecban Uleḥlu, Daḥmani Belɛid, Ɛmiruc, Raḥima Xelfawi, Baylac d wiyaḍ i yecnan. Akken daɣen i d-yella umur n umezgun akked Atef Lewhama d tmezgunt i d-yurar s lmeɛna. Imdanen i d-yusan, ččuren annar n Ginduz, xelṣen yakk 300 n yidinaren s tefses, imi ẓran d tagmat i d-yessawalen deg tegnatin yecban tigi. Akken i yella deg yinzi « Kerheɣ gma, kerheɣ win ara t-yewwten ».

Ɣas ma ttemɣunzun tikwal Leqbayel gar-asen, maca deg tegnatin n ddiq, ttgen afus deg ufus. Am tegnit n wass-a, imi tigawt-a n ujmaɛ n udrim i umuḍin, tuɣal d lɛada deg tmurt n Leqbayel, u s lferḥ i d-ttarran yimdanen i teɣri, ama s ttawil n tmeɣriwin n ccna, ama s ttawil n yiberdan sɣur yiwiziwen d tddukkliwin.

I usmekti, tameɣra-a daɣen, tella d tajmilt, anda i d-yella usmekti n wass n uɣlan Aqbayli i d-yettuɣalen yal 14 yunyu, d asterḥem ɣef terwiḥin n 128 n yilmeẓyen i iruḥen d asfel deg tefsut berriken n 2001, akked tikli tameqqrant i d-yellan di tmanaɣt deg wass yecban ass-nni. Dɣa cnan-d Amirouche d Oulehlou kra n tezlatin timḥaddiyin i d-yesmektan azemz n, 14 yunyu 2001.

Dduklen yimezdaɣ i temεiwna

Ǧeṛaḥi Sami, d yiwen n yilemzi i yesεan 8 n yiseggasen di leεmeṛ-is, yezdeɣ deg tɣiwant n At Ṛzin, tadayṛa n Yiɣil Ɛli.

Sami d agrud ur neddir tagrudant-is akken yebɣa, acku aṭṭan ur t-yeǧǧi ara, dɣa iḥettem-it ad d-yeffeɣ ula seg uɣerbaz. Yerna aṭṭan-is d win iweεṛen nezzeh, d win n uxenzir n uqeṛṛu (gliome bilatéral cérébral). Lame3na ɣas ma yella tagnit i yettidir Sami mačči d tin isehlen, imezdaɣ n temnaḍṭ-is, llan d irgazen, bedden s idis-is netta d yimawlan-is, i d-yegren yakan tiɣri i wid i ten-iḥemmlen, ad asen-fken afus n tallelt. Daymi i d-snulfan Agraw n temεiwna ilmend n Sami, i wakken ad t-εiwnen. Dɣa agraw-a, ihegga-d yiwet n temlilit n ccna sɣur unaẓur Uleḥlu, deg unnar aɣiwan n At Ṛzin di Genduz, ass-nni n, 14 yunyu 2019. Rnu ɣer Uleḥlu, llan ddeqs n yinaẓuṛen-nniden, am Ɛmiṛuc, Baylac, Ɛaṭef Lewhama, d Ḥmidu Anza, d wiyaḍ. Inaẓuṛen-a yezdi-ten yiswi, d uḥulfu n lemḥenna i sεan, i wakken ad as-fken afus n tallelt i ugrud amuḍin.

Ad d-nesmekti d akken, anekcum, yella-d s 300 n yidinaṛen. Ccɣel-a d tagnit i wakken ad d-jemεen cwiṭ n usuṛdi, ahat ad yezmir Sami ad yettwadawi di beṛṛa n tmurt, imi di tmurt n Lezzayer ur tnuḥ ara ddwa n waṭṭan-a. Ladɣa, imi yella usirem ad yeḥlu, wa ad yidir am netta am warrac-nniḍen.

Di taggara, i wid yebɣan ad t-iεiwin, ad ssiwlen i wuṭṭun 0557 52 43 90, neɣ ad ceggεen idrimen ɣer wuṭṭun CCP 007 99999 0025015909 21.
K. K. / Kh. A.