Thegga-d tɣiwant n Ayt Smaɛel, ass n acer 06 deg yennayer, yiwet n temlilit n umcawer d umbaddel n tektiwin gar umazan (député) n FFS Mass Nasir Ɛebdun akked yisegbaren n umussu asdukklan n tɣiwant-a i d-nebder. Akken i d-tewwi teɣbalut-nneɣ, tusa-d abeɛda temlaqit-a akken ad tefk tagnit i wid akk iqeddcen deg tddukkliwin yemgaraden n temnaḍt ad ccektin i umazan n Bgayet s wayen akk sɛan d iɣilifen neɣ s wayen i d-ttmagaren d uguren send ad d-heggin asihar neɣ d armud. Dɣa, ddeqs n yilemẓiyen i iḥeḍren i temlilit i d-yellan deg uxxam n tɣiwant n Ayt Smaɛel, yal wa yefka-d asteqsi-s neɣ d tikti, i usbeyyen n wugar n tafat deg uskasi-nsen. « Ilaq ad d-qirreɣ d akken tɛedda temlilit-a s wudem yelhan maḍi. Nessaweḍ neḥsa ugar s waddad, inezgumen d wuguren n tddukkliwin-nneɣ. Yefka-aɣ waya tagnit ad nẓer daɣen belli yessefk ad nettemlil yal tikkelt akken ad nettemɛawan, ad nbeddel liḥala-nneɣ », i d-yura uselway n tɣiwant n Ayt Smaɛel, Sadeq Rebbaɛi, deg usebter-is n Facebook. Yerna-d daɣen, imi iwala d akken anejmuɛ-a yewwi-as-d taɣawsa d tilawt (positive): « Tella temlilit d tagnit i nekni ad nesselɣu ilemẓiyen s wayen iḍerrun deg waṭas n yiḥricen. Umreɣ ayendin seg termit n kra d tḥerci n wiyaḍ-nniḍen ». Si tama-nniḍen, ula d ilemẓiyen i yekkin deg usihar-a, nnan s umata ayen yelhan fell-as. « Imi d tikkelt tamezwarut ara yili ssenf-a n temliliyin di tɣiwant-nneɣ, akked umazan-nneɣ Nasir Ɛebdun, zemreɣ ad d-iniɣ neffeɣ-d s kra n usirem seg uxxam n tɣiwant. D acu, ur ilaq ara ad yeqqim d awal kan wayen akk i d-nenna teɣzi n unejmuɛ », i iwala yiwen seg-sen.
M. K.