Mazal ittkemmil leqdic adelsan d unaddal deg tɣiwant n Ait Aissa Mimoun, anda i d-yeḥya i tikkelt-nniḍen umussu adukklan di tama-agi. Ass-nni n lexmis, 30 maggu 2019, tella-d temilit n waddal n boxe, ideg i d-llan 10 n yimerẓa yemxalafen di lmizan d uswir-nsen. D leqdic i d-tesduri tddukkla tanaddalt “ACSAAM” s tallelt n tsaɣent (ligue) n waddal n boxe n lwilaya n Tizi Uzzu.
Yebda leqdic-agi ɣef 22h00 n yiḍ, deg uɣerbaz amenzu “Hacmi d warraw-is” n taddart n Tahanouts. D ddqiqa n tsusmi, i d-yellan d tamezwarut d tajmilt i Mass Chabane Hocine, yewwḍen leɛfu rebbi ddurt iɛeddan. Deffir-s kan, yella-d umeslay s ɣur yimsuddsen n urmud-agi. D aselway n tddukkla-agi “ACAAM”, Mass Kheddam Mohend, i d-yefkan awal n tazwara, anda i yesnemmer merra wid i d-yerran i teɣri-nsen, yessarem daɣen mačči d tikkelt tamezwarut neɣ d taneggarut ara d-yili leqdic-agi meqqren.
Syin yettunefk wawal i uselway n tɣiwant Mass Chabane Akli akked Mass Erouane Nacer aselway n tsaɣent n waddal n Boxe di lwilaya n Tizi Uzzu. Tin ɣur-s, tella-d tegnit n turart n wurar n Ging Boksing sɣur inaddalen ilmeẓyen n taddart-agi n Ighil Bouchene. Syin akkin, tebda s wudem unṣib temlilit-agi n Boxe, ideg i d-llan 10 n yimerẓa gar yinaddalen i d-yerzan seg ddeqs n trebuyaɛ n waddal-a di lwilaya n Tizi Uzzu. Llan yimenɣan, yeffɣen ɣer yilem (nul) llan wid ideg yella win irebḥen timliliyin.
Yal mi ara salin tlata n yimerẓa, yettili-d ujbad n tesɣar deg wurar n tombla, anda i ttmudden arrazen i wid yesɛn “zzher”. Ulamma isemmeḍ mliḥ lḥal deg berra, maca ukin-d yimferǧen s umennuɣ aneggaru i d-yellan gar Chaib Ayoub, mmi-s n taddart n Ighil Bouchene, alɣuɣ n lwilaya d ulɣuɣ aɣelnaw deg waddal-agi n Boxe. Yennuɣ netta d unaddal Alkama Hacene n terbaɛt n “Tizi Boxe”. Yesuli amennuɣ-agi s rrbeḥ n Ayoub Chaib, i yerran tajmilt i bab-as Chaib Mohend, i lmend n wayen i d as-yexdem. Tessuli temlilit-agi s ufraq n yigerdasen n usnemmer i wid akk yekkan ama s lqerb ama s lbeɛd deg usɛeddi n temlilit-agi deg tegnatin igerrzen.
Adaoun Abdelghani