Accueil Tamazight Tirza ɣer Temriǧt d Yiderginen

Agraw n yiḥewwasen n Uweqqas

Tirza ɣer Temriǧt d Yiderginen

101

Ahat tɛedda twinest n tuffɣiwin i d-ihegga, ar ass-a, Ugraw n yiḥewwasen n Uweqqas ɣer waṭas n yimeḍqan yemgaraden n yidurar n Tmurt Taqbaylit abeɛda. Dɣa, yessuddes-d Ugraw-a, ddurt yezrin, yiwet n tuffɣa tamaynut ɣer yidurar n tɣiwanin n Temriǧt d Yiderginen. Tikli i gan yimekkiyen ɣef uḍar tɛedda ahat 22 n yikilumitren di teɣzi, imi tebda seg temnaḍt n Temriǧt, teḥbes deg tin n Yiderginen. Ula d iɛeggalen d yimeltaɣen n tddukkla « Alto anaddal n Skikda » llan d inebgawen n tirza-a, imi d-usan deg 42 deg-sen.

Dɣa, kkren-as yiḥewwasen i uḥerrek seg taddart n Ɛekkac, di tɣiwant n Temriǧt, ṭṭfen syin abrid deg yiberdan n yidurar armi d-subben deg taddart tabaḥant n Ayt Felkay. Din, furṣen tagnit wid itteddun, ad d-ɛeddin seg yimazzaren icebḥen i inuḥen deg temnaḍt-nni. Am yal tikkelt, ulamma tella tewɛer ɣef kra gar usawen d ukessar, tesmurres tuffaɣa-a-nniḍen n Ugraw n yiḥewwasen n Uweqqas, deg tegnatin n tumert, lebɣi d teḍsa. D ayen i yezmer ad d-yessenfali ḥedd deg urebbi n ugama d ccbaḥa i d-ttakkent tugniwin i wallen n yimedduyen. Ayen i d-ijebden daɣen ddhen di ttiɛad-a, d mi yekki ula d yiwen n uḥewwas n Skikda i yessawḍen 79 n yiseggasen di tmeddurt-is. Seld aḥewwes-a s adrar, ɛeggnen-d yakan yimheggiyen i wid yeṭṭafaren armuden-nsen s tuffɣa-nniḍen ɣer Tgemmunt d Buxlifa, anda ara ɛeddin seg Taɛzibt armi d Ayt Genduz.

M. K.