Azemmur, d armud gar yirmad n leqbayel, yettas-d lawan n tegrest. Ibeddu deg wayyur n tuber. D yiwen seg wansayen-nneɣ i d-ğğan lejdud-nneɣ. Ad naf taddart n Wat Laɛziz, teṭṭef deg urmud-agi, imi yal tasebḥit mi ara yelhu lḥal, ad ffɣent twaculin akken ad ruḥent, ad leqḍent azemmur. Seg useggas–nni 2012 mi d-yewwet udfel, yenɣes s waṭas uzemmur imi helken yisekla , txus zzit. Maca aseggas–a, yurew uzemmur s waṭas, yerna bdant snat n lemɛinsrat n twacult Zennouche, imi nutni aṭas iseggasen-aya i sɛan lemsinsra. Zik s wallalen iqdimen, ma d tura s tmacint tamaynut. Tella lemɛinṣra–agi–nsen segmi llan lejdud-nsen. Ar ass-a n wussan, mazal-iten xeddmen-tt. Ma d ssuma n zzit, ur tbeddel ara ɣef yilindi : 700 idinaren. Maca, mi ara twaliḍ leɛtab yesɛa ssuma-agi n zzit, ad naf rxiset maḍi, imi llant kra n twaculin, ad lḥunt azal n tsaɛet akken ad awḍent ɣer tferkiwin-nsen. Llan wid ibeddun lqeḍ seg wayyur n tuber almi d ayyur n meɣres, imi mačči yal ass i ttruḥun ad leqḍen. Ttrağun kan asmi ara yelhu lḥal, ulac ageffur. Maca, xas d asemmiḍ neɣ d agris, ttruḥun, awi-d kan ad d-jemɛen rrezq-nsen. Mi ara yelhu lhal neɣ taggara n ddurt, teddun ula d inelmaden, ttalen imawlan-nsen ula d wid n tseddawit , imi deg taddart –agi teɣriḍ neɣ ur teɣriḍ ara, mi ara yili ccɣel, ad t-txedmeḍ d winna i d amezwaur. Ad ruḥent s tumert, ad awint yid-sent twaculin tagella ara ad ččent, ama d aɣrum d ifelfel neɣ seksu, imi deg lexla yettiẓiḍ lqut, abeɛda mi ara tili twacult tennejmaɛ-d. Mazal wid yeccewwiqen , icennun lawan n uzemmur, llan wid yettawin yid-sen radyu ad slen i tezlatin i d-yettɛaddin deg yimaṭṭafen n Tizi Uzzu neɣ amaṭṭaf wis sin. Ma ɣef lawan n tanalt, tessen lqahwa d uyefki s teḥbulin. Ad leqḍen, ad ttnecraḥen alamma d tameddit. Mi d lawan n tuɣalin , ad msawalent twaculin yemqaraben akken ad ddukklent s axxam. Gellunt-d yid-sent tiɛekkmin, ama d isɣaren neɣ tiqjemyar, imi taddart-agi mazal ur tesɛi ara lgaz n temdint. Ma d irgazen, rennun alamma yeɣli-d yiḍ, imi ttfarasen n liḥa n tegnewt i igerrzen. Llant kra n twaculin, ur nesɛi ara azemmur, ttaṭṭafent amnaṣef, awi-d kan ad xedmen armud-agi i d-ğğan lejdud-nneɣ.
Zakia Ben yahia