Akken iban lḥal, tettili tikwal temḍerrit seg wayen ixeddem ugama. Tikwal iḍerru-d kra ur ihewwu i yimdanen, imi d taxessart i d-yetteggrayen, ur d abaɣur i yettwawfayen. Nnig n zznezla, times d waḍu i izemren ad gen asewwiɣ, ad bedlen s ndir addad i d-ufan, yella daɣen uḥammal n waman. Aḥammal-a, ihi, neɣ iḥammalen-a, am wayen-nniḍen i d-iḍerrun di kra teswiɛin n ddunit, snernayen-d tuggdi deg wulawen n lɣaci. Ɣas ahat ur d-ttsebbiben tikwal deg temḍerrit i terwiḥt n umdan, lameɛna mi ara tent-yaɣ wakal, yettaɣ-iten ula d amdan s timmad-is. Dɣa, deg Ayt Smaɛel, akal deg tegrest ireṭṭeb, yettmagga d amihi i tikli. Amedya. Ad d-nemmeslay ɣef Uneqquc d wayen yeḍran deg umkan-nni aseggas yezrin, asmi yeɣli yexser ubrid, tmentilt, d aman i yesɣelben ɣef tɣarit n wakal. D ayen yeǧǧan inehharen ad ttɛeddayen seg Rrif di leɛḍil almi yettwaseggem ubrid-nniḍen n Uneqquc, mbeɛd mi teqdec deg-s termist (entreprise) s ubellez. Acu kan, ɣas iban-d zun uɣilif yefra, maca mazal yezmer ad d-yennerni ma llan-d yiḥammalen iweɛren. Ula d lxuf, ur yefsi seg yiterrasen, ladɣa inehharen. War ma nettu adeg n Leɛnaser, acku aneggaru-a, aṭas n txessar i d-yessegra imi xilla daɣen i ibedlen deg-s seg kraḍ n yiseggasen yezrin, ar ass-a. Aya, yuɣ lḥal yekka-d seg yigeffuren i d-yettmarayen s ccyaḍa yal tagrest.
Kaisa Khalifi