Accueil Tamazight Tisirit yebnan ɣef nneyya n yigerdan

Tisirit yebnan ɣef nneyya n yigerdan

Asuter n Unẓar

197

Seg zik n zik, ssuturen deg tudrin n leqbayel Anẓar yal tikkelt mi ara teẓruref lqaɛa ; mi ara tuɣal tmurt d aɣurar. Tisirit-a, teqqen ɣer tedyant n ugellid n waman Anẓar akked yiwet n teqcict i yugin niqal ad t-taɣ deg tazwara. Tameṭṭut-a, tezga tesucuf deg yiwen wasif, yal mi ara d-iṣubb ugellid n waman Anẓar, ad teffer iman-is. Yiwen wass yenna-s : ‘’Ad d-tefkeḍ ayen bɣiɣ, neɣ ad am-kkseɣ aman’’. Tugi teqcict ccerṭ n Ugellid, dɣa yekker yebren taxatemt, din-din yeqqur wasif. Deg taggara, teqbel teqcict lebɣi n Ugellid, syin uɣalen-d waman s amekkan-nsen. Ha-tt-an s tewzel tsirit-a. Seg yimir, ssuturen Anẓar yal tikkelt mi ara teqqar lqaɛa, meḥsub ur d-yewwit ara ugeffur deg lawan-is. Ddurt-a dɣa, yella-d usuter neɣ lxedma n Unẓar deg waṭas n tudrin n leqbayel.

Nnejmaɛent temɣarin, fkant ttiɛad i usiher-a. Mi d-yewweḍ wass-nni, cebbḥent i uɣenǧa, rrant-t am wakken d tislit ara fkent d tarzeft i Ugellid n waman Anẓar anda ara ssutrent tiririt n tunṭict-a, meḥsub ad d-iserreḥ i waman (ageffur). Ad ttɛeddayent axxxam axxam, ad d-jemɛent isufar n tgella i wakken ad xedment azekka-nni imensi n Unẓar. Timɣarin-a, ttawint arrac imecṭaḥ i yettɣennin yid-sent, ssuturen ageffur deg Ugellid n waman Anẓar. Ɣef wakken i aɣ-d-nnant temɣarin-a, ttawint igerdan axater d nutni i yesɛan nneyya, ad ten-iqader Unẓar u ad t-ɣiḍen imi meẓẓiyit, dɣa ad asen-yeddu deg lebɣi, ad d-yewwet ugeffur. Ladɣa imi timɣarin-nni kkaten igerdan-agi s uẓegduf, yiwen n yimɣi i iteqqsen mliḥ, syin ad ttrun warrac mi ara yennal yimɣi-agi taglimt-nsen. Akka, ara d-tettru tegnawt fell-asen, ɣef leḥsab n tsirit.

Ma d asuter n Unẓar, yettili-d s usefru-a deg waṭas n temnaḍin :
‘’Anẓar, anẓar, A Rebbi, sseww-itt ar aẓar.
Ad teww nneɛma n udrar,
Ad ternu tin n uzaɣar.
Axenǧa, yetteqliliḥ,
Nnig n uxxam Uqiliḥ,
A Rebbi, seww-itt-id Mliḥ’’.
Akken yebɣu yili lḥal, awi-d ukan ad yili ugeffur, ladɣa ma neẓra d akken tettekk-d tidet seg yimi n ugrud. Akka, dɣa, i deɛɛunt temɣarin ‘’A Rebbi, ur aɣ-ttqassa ara ɣef wudem n llufan’’. Tisirit, d tisirit, akka ay tga, yerna d tigejdit n yal idles, xas ur tt-numin ara.
Hocine Moula