Qqaren At zik, xdem lqaεa ur ak-txeddeε ara, bedd-as i lqaεa ur ak-tettaǧǧa ara. Tafellaḥt d axeddim i defṛen yimezwura-nneɣ, s yis-s i ddren tudert n sser, imi neẓṛa lexṣas i yellan zik deg mkul tama. Ama seg tama n uxeddim, n tudert, neɣ n uswir n ttwaddra. Meεna imezwura, xelqen-d i yiman-nsen axeddim, fkan-as azal i tfellaḥt, ḍefṛen-tt. Dɣa ula d nettat, terra-asen tajmilt tessečč-iten. Ass-a axeddim-a zeddigen, yebnan ɣef sseḥ, ǧǧan-t medden, zzin-as s uεrur. D ayen i deggren kra n yimezdaɣ n taddart n At Smaεel, d wid yegzan abaɣur n lqaεa d wayen i aɣ-d-tettak. Mlalen deg yiwen n unejmuε i wakken ad d-sbedden aselway i tddukkla n yikerrazen ara d-ilalen. Ayagi yella-d ass n sem, 28 deg duǧember yezrin, anda i mmsefhamen wid i d-yusan d akken ilaq ad as-fken i usenfar-a azal-is, acku At Smaεel si zik mucuε-itt s tfellaḥt. Ayen yessebɣasen, d tamuɣli n yimezdaɣ, i yumren nezzeh s tikti-a. Gar-asen aselway n tɣiwant Mass Sadeq Rebdaεi, i yettaken afud uzmir i umussu asdukklan. Dɣa yenna-asen belli ad asen-yefk afus n tallelt, yerna s tumert tameqqṛant. Seg tama-nsen ifellaḥen n taddart, yehwa-asen ccɣel-agi, ula d nutni εewwlen ad εiwnen imḍebbṛen n tddukkla deg uxeddim-nsen, yerna ad bḍun tarmit-nsen d tmussni i kesben deg unnar. « Nessaram ad ṭṭuqtent tddukkliwin am tigi deg tuddar-nniḍen, axaṭer uqant yerna mliḥ, xas akka tturarent nnuba meqqer deg usiweḍ n tektiwin i yimezdaɣ ». i aɣ-d-yenna yiwen n urgaz.
K. K.