Mazal tawaɣit n ugzam n yisekla d usexreb n wayen yakk icudden ɣer ugama yettkemmil deg twilayt n Wehran. Tawaɣit n tikkelt-a, truḥ ad tɛeddi tilas, imi ssawḍen kra n yimetjaren ibeznasen n wakal, ad gezmen ugar n 200 n ṭṭjur deg yiwet n teẓgi iwumi ssawalen Kuka, i d-yezgan ɣer tama n lfirma Xmisti. Yeḍra-d waya deg sin n wussan kan. D isalli i d-yessuffeɣ uqerru wis sin n tɣiwant Buɛmama, mbeɛd mi asen-d-ssawḍen lexber kra n yimezdaɣ n tama-nni.
Dɣa imir kan, ssawlen seg tama-nsen i umḥaddi (commissaire) n tẓegwa d yiɣallen n laman ad gen tasastant u ad ḥebsen wid igan taxessart-a. Di talɣut i aɣ-d-yewwḍen seg kra n tamiwin, imukar-a n wakal, furṣen tagnit n tmesbaniyin d unḥerrak i d-iḍerrun acḥal-aya deg tmurt, imi imdanen d ugdud yakk dhan d tuffɣiwin s abrid d utbaɛ n yisallen s anda ssawḍent temsal, ma d tarbaɛt-a, txeddem ccɣel-is s tuffra. Tarbaɛt-a, i usmekti, ttekkin deg-s 8 n yimdanen, mbeɛd mi ara ḥewṣen leqwaɛi, ttqeɛɛiden akal, ttarran- d ayla-nsen, syin snuzuyen-t akken d imersunen neɣ tikwal bennun kra n yixxamen yeffɣen i usaḍuf akken ad sen-ɛiwden lbiɛ i kra seg wid yesran i tnezduɣin s tɣawla.
Khaled Achoui