Aouizet Kader, d yiwen gar yicennayen iqdimen, i yeffren iman-nsen acḥal d aseggas, syin yuɣal-d ɣer ccna n teqbaylit, mbeɛd 27 n yiseggasen. Deg yiseggasen n 80, i yebda amecwar-is di ccna, imir yella d ilemẓi, yessaramen ad yili d acennay. Yella yumen belli yal amdan mi ara d-ilal ad yebɣu ad d-yeffeɣ d kra: d acennay, d amejjay, d aselmad… Ula d netta akken i tt-yessarem i teffeɣ, yedder lweqt armi i d-yufa iman-is d acennay. D tizlatin n Ḥamiduc, i t-id-ijebden ɣer ccna, dɣa yuɣal yettɣenni tizlatin-is.
Ulamma yebda ccna deg yiseggasen n 1980, maca i yiman-is kan, yeqqim 27 n ssna n tsusmi. Deg useggas n 1991, yeskles tasfift-is tamenzut deg yiɛezzugen, maca ur tt-id-yessuffeɣ ara imi di tallit-nni yekukra, yerna yesɛa uguren. Syin akkin, ikemmel kan deg ccna n tmeɣriwin sya u sya. Armi d aseggas n 2018, i d-yuɣal s wudem unṣib ɣer ccna s tesfift iwumi isemma iḍelli, i d-yeffɣen ɣer tezrigin New Music n Yiɛeẓẓugen.
D tasfift ideg llant 10 n tezlatin s teqbaylit, gar-asent: Tabrat, Staɣfir Llah, Timeqbart, Iḍelli, Ccwal…atg. Yal tizlit ɣef wacu i d-tettawi awal deg-s, amedya ɣef tayri deg tezlit-nni “Tin iɣef ɛawzeɣ uḍan”, ɣef temẓi d wamek yella umeskar d wamek yuɣal di tezlit-nni “Iḍelli”. Ɣer taggara, ad d-nini belli Aouizet, yettheggi tasfift tis snat ara d-yeffɣen deg wussan i d-iteddun. Ad yawi isem n “Sweɛdeɣ”, ideg ara yilint ddeqs n tezlatin gar-asent-: Sweɛdeɣ, Aɣrib, Aḥbib… Ad d-nesmeki kan belli, Kader Aouizet yexdem yakkan deg umaṭṭaf wis sin maca cwiṭ n lweqt kan syin yeḥbes.
A. A.