Accueil Tamazight Tudert n tmara n Naima Benazzouz

Ajdid di tira

Tudert n tmara n Naima Benazzouz

135

Yeffeɣ-d wungal amaynut i d-yernan amur-is i tsekla tamaziɣt deg wussan yezrin sɣur temyarut Naima Benazzouz. D ungal iwumi tefka asentel “Tudert n tmara”. Win ara imuqlen deg uzwel-agi, send ad iɣer adlis, ad yerr kra n tikta s allaɣ-is, d tid yerzan teqṣeḥ, taɛert d maḥyaf yeṭṭfen amkan-is di tmetti, d tin yeǧǧan imdanen yecban lal n wungal-a ad qablen tudert s tmara, ma neẓra d akken Naima, ur tettwali ara. Maca s tebɣest i tekseb, s leḥmala-s i tutlayt-is tayemmat, tin akken ur teɣri ara deg uɣerbaz urǧin tekcim di tudert-is ula d yiwen wass, yeǧǧa-tt ad telmed tira n tmaziɣt, ad d-teslal tikta i tt-iceyɛen ɣer lebḥer n tira. Tessaweḍ ad taru ddeqs n yiḍrisen d yisefra d yismektiyen, ɣas akken xuṣṣen-tt ttawilat akken ad ten-id-tessuffeɣ. Tikkelt-a, teḥḍer-d tegnit i usiẓreg n ufaris-is amenzu.

Yewwi-d wungal s umata ɣef sin n yilmeẓyen, Mastan d Ferruǧa i tezdi tayri, maca yal yiwen s tmuɣli-s ɣer tayri-a d wamek ssezrin temẓi-nsen. Mastan, yezga yettaḍsa mi ara d-ihedder, ma d Ferruǧa yettnuɣnay wul-is acku ur tufi ara iman-is. Tesseqdec daxel tasekla fessusen icebḥen, deg kra n yiḥricen, tusa-d zun d isefra, imi d tiftyar yesɛan yiwet n tmeɣrut ɣer taggara. Tazwart n udlis, tura-as-tt uletma-s Katia Benazzouz yesselmaden tamaziɣt di tesdawit n Bgayet. Yeffeɣ-d udlis-a ɣer teẓrigin Boussekine, s tallelt n uletma-s Katia, yettwasuzer deg waṭas n temnaḍin n Bgayet d Tizi Uzzu. Yettnuzu s 500 n yidinaren. I usmekti, Naima Benazzouz, tlul deg useggas n 1982 deg taddart n Yiɛezzuzen (Bgayet). Ɣur-s iṣenfaren-nniḍen i tebɣa ad teg sya d asawen.
Kh. A.