Yal tiddukla amek id-ttheggi leqdic i wesfugel n tmeγriwin d tmesbaniyin n yedles n teqbaylit d tmaziγit s umata. Dγa Tiddukla Tadelsant Tiεwinin n Wizgan lwilaya n Tizi-Wezzu, sudusen-d yal seggas yiwen n leqdic s wazal-is i usebγes n tutlayt n tmaziγt, imi aseggas-a, tella-d temzizelt tis snat n tzabut s tutlayt n tmaziγt deg wexxam n yedles Colonel Muḥend Welḥağ n taddert n Wizgan, d timzizelt n waraz Mhenni Amroun, yiwen n unaẓur i tewwi tmettant ass n 19 yebiri 2012. Dγa imlend n usmekti n umuli wis 03 γef tmettant-is, d usmekti n umuli wis 35 n tefsut n yimaziγen, sudsen-d tamesbanit-agi n temzizelt n tzabut anda i yukkan 79 n yinelmaden n weswir alemmas d 52 n yinelmaden n weswir amezwaru, i yettmetilen 38 n yiγarbazen yemgaraden. Akken iḥedren nnig n 20 n yiselmaden n tutlayt n tmaziγt n temnaḍin yemgaraden n lwilaya n Tizi-Wezzu, id-yeldin ulawen-nsen i leqdic-agi yesεan azal meqren.
Dγa di temzizelt-agi tufrar-d tamsiwt Chaker Kamilia n uγarbaz alemmas «Azoug Arab d mmi-s Saïd» n taddert Ḥura akked Younsi Abdellah n uγarbaz amezwaru n umaγras « Belabbas Mohand Tahar» n taddert Ahriq. Di tagara n temzizelt-agi tella-d tikci n warazen n usebγes yesεan azal meqren, anda inelmaden merra iḥedren timzizelt-agi saramen akken ad-tuγalent yal tikkelt tmesbaniyin-agi.
Islam Bessaci