Tamehla n yidles n Tizi-Wezzu tsudes-d aseggas-a yiwen n leqdic s wazal-is ilmend n wass aγelnaw n unaẓur id-yettuγalen yal ass n 08 yunyu, anda ijarden yiwen n wahil d amesbaγur γef teγzi n 02 n wussan, d tijmilin i deqs n yinaẓuren n yeḥricen yemgaraden.
Leqdic yebda ass n 06 yunyu anda i rran tajmilt i 11 icennayen n tarbeεt n uzawan atrar n leqbayel wigi «ABRANIS, AFOUS, AGRAW, DJURDJURA, IDEFLAWEN, IGENNADEN,IGOUDAR, IKHOULAF, IMAZIGHEN IMOULA, ISSOULAS, TAGRAWLA, YOUGOURTHEN »
Dγa icennayen-agi s wayen sεan di tezmert-nsent almi d-sbanen ccna n teqbaylit, gan-as amḍiq ger cnawi n umaḍal, γas akken weεrit wuguren d-ttmagaren, xarṣum deg yiseggasen n lḥars 70 d 80 maca qublen tallit akken tella, dukklen afus deg ufus almi ṣawḍen sullin tizlitt taqbaylit tufrar-d ger tezlatin n tmura n lbarani. Dγa tabraḥt n leqdicat n wexxam n yedles n lmulud n at mεemmar, yesduri-d timzikniyin yemgaraden γef tudert d umecwar n tẓuri id-win, syen llant-d temliliyin tinigiyin. Ma yella deg ass n 07 yunyu i yellan d ass wis ssin n leqdic, tuγal tejmilt i yiwen n wejgu n ccna ssinima n teqbaylit, wagi d AZEDINE MEDDOUR akked d 14 n yinaẓuren i yetturaren deg usaru-ines Adrar n Baya i yeseklas deg temnaḍt n Wizgan (Bouzeguène) i tewwi tmettant deg ṭarḍeq n yiwet n lbumba isaxdamen deg sekles n usaru-agi, deg seggas n 1995. Tajmilt-agi yesduritt-id tzeqqa n ssinima n Tizi-Wezzu s leḥdur n twacult n tẓuri. Yelha ma yella nebder-d anaẓur xersum s tewzel n wawal acku akken nebɣu newwi-d awal fell-as, ur nezmir ara ad d-nezzi yakk ɣef wayen yexdem. Taẓuri d lebḥer lqayen, d lebḥer wessiεen, ur yezmir yiwen ad t-yelḥeq akken yebɣa. Ihi taẓuri d tafat n wallaɣ, d iṭij n wass, d tiziri n yiḍ, d tilelli n wemdan. Taẓuri tessakay amdan yellan yeɣfel, tettak tisura swayes ara ldint tiwwura n unekcum s wulawen anda teẓẓun tayri. Taẓuri ur tesεi ara tilisa, tessengugga idurar, tzegger lebḥur, tcerrig igenwan, ur tettağğa amḍiq, yal tiɣmert di ddunit tewweḍ-itt. Anaẓur yessen d acu i d azal n tẓuri, yeẓra d acu i ilaqen ad t-yernu i tussna n tẓuri ara iɣellten wid yessaramen ad ifriren gar leğnas. Anaẓur yettḥussu, d anafray, ismendag allaɣ-is, iẓemmi-t akken ad iniwel taẓuri swayes yezmer ad d-icekti, ad yessufeɣ afrayen-is, syen ad yezreε tamusni-s d tẓuri-s.Taẓuri d tilleli, ur tcudd ara ɣer yiwen n umḍiq, tleḥḥu, tessuruf tilisa, trezzef si wa ɣer wa, ur tkeffu ara deg-s lɣella, ur tesεi ara taggara. Dima yettlalay-d umaynut ɣef umaynut. Maca i tmurt-nneγ izerfan n unaẓur ulac-iten, sarwaten ttεebin wiyaḍ, teḍra yid-sen am tcemmaεt, trreq tettfaka tettak tafat i wiyaḍ. Ihi anaẓur yuklal ayen yugaren tajmilt-agi.
Islam Bessaci