Accueil Tamazight Tugzimin timaynutin n lbanka tazzayrit

Tugzimin timaynutin n lbanka tazzayrit

18

Tessufeɣ-d lbanka tazayrit tugzimin tibankatin akked tepyasin timaynutin ara yettwasselḥun seg tlemmast n wayyur n furar-a, ɣef leḥsab n teɣbalut-nneɣ.Tamsalt-a abeεda, teεna snat n tugzimin n 500 n yidinaren akked tin n 1 000 n yidinaṛen.

Ma yella seg tama n tepyasin, d tin n 100 n yidinaṛen i d-yennulfan. Ayagi, ɣef leḥsab n umaray amatu ( secrétaire général ) n lbanka tazzayrit Mass Leḥbib Gubi, yella-d i wakken ad rren tadrimt d tamaynut. Mass Gubi, yessegza-d d akken tadrimt-agi tajdidt, ad teddu lwaḥi d tinna n teqbuṛt, imi azal d ssuma-nsent d yiwet. Ad d-nesmekti belli tugzimin-a, sεant azemz n umenzu n unbir 2018.

Ma yella ɣef tsekta-nsent ( dimension ): 150 × 71,7 mm i tin n 500 n yidinaṛen, anda i d-seknen Lezzayer s wudem n teknulujit n yisalli akked teywalt, anda i d-yedda wunuɣ n Masinisa. Ma yella d tugzimt n 1 000 idinaṛen, tasakta-s 160 × 71,9 mm, asentel-is ɣef yidles, ansayen, akked tetrara, anda i d-yedda wunuɣ n Lamir Ɛebdelqader. Ayen yeεnan tapyast n 100 n yidinaṛen, tettwaxdem s wuzzal ur nrekku, yerna d win ur nfessi s sshala.

Di tagarra, tamsalt-a n uqeεεed n tedrimt, d tin ilaqen, akken i d-yenna yimdebbeṛ n lbanka tazzayrit di unbir yezrin, d ayen iwulmen, imi tella tedrimt i yesεan ugar n 300 n yiseggasen segmi i d-teffeɣ. Seg tama n ugdud azzayri, yebɣa ad yali wazal n usuṛdi mačči ad d-twabeddlent tugzimin, ɣef leḥsab n tnagiwin-nsen.

K.K.