Ulamma tineggura-agi, yuzel aṭas wawal ɣef usmutti n yikaden unṣiben n useggas aɣurbiz 2018-2019, maca taneɣlaft n usegemi d usedwel aɣelnaw Massa Nouria Benghabrit, tenna-d belli ad d-yili uqader n lejrida n yikayaden-agi n taggara n ulmud. Mazal timḍebbert tamezwarut, teṭṭef deg wazemz ideg tturaǧun ad d-ilin tlata-agi n yikayaden n ulmud (5e, BEM d BAC).
Yetturaǧu ad qqimen akken i ten-id-tesumer tneɣlaft n usegmi, di tazwara n waggur n cutember iɛeddan. Ad nebdu seg ukayad n taggara n uswir amenzu 5e, i yetturaǧun ad d-yili ass n larebɛa, 29 deg waggur n maggu (29/05/2019). Ma d win n taggara n uswir n ulmud alemmas, yettwassnen s yisem n BEM, ad d-yili seg wass n lḥed, 09 alamma d ass n ttlata 11 seg waggur yunyu (09-10-11/05/2019).
Ma d win n taggara n uswir n tsenawit neɣ ayen iwumi qqaren BAC, yetturaǧu ad d-yili seg wass lḥed, 16 yunyu alamma d ass lexmis, 20 deg waggur n yunyu (16-17-18-19-20/06/2019). Ad d-nesmekti kan belli akayad n waddal i yinelmaden imunan, yerzan imsizewren n taggara n ulmud alemmas (BEM) d win n taggara n ulmud n tesnawit (BAC), yebda yakan ukayad-agi n waddal i yinelmaden imunan, ass-nni n lexmis, 21 meɣres-agi iɛeddan, ad ikemmel alamma d 06 deg waggur n yebrir ideg nella. Yetturaǧu sya ar ass n lexmis, 03/04/2019, ad t-sɛeddin wazal n 198 262 n yinelmaden imunan yettheggin akayad n BAC i tezrigt-agi 2019, gar-asen 117 526 d arrac ma d 80 736 i d-yeqqimen d tullas. Yettili-d usɛeddi-ines deg 187 n wammasen n uɛeddi, ma d uṭṭun amatu n yinelmaden imunan, yettheggin akayad-agi n BAC yewweḍ aseggas-a ɣer 262 415. Am wakken daɣen yetturaǧu, ad t-sɛeddin wazal n 11 763 n yinelmaden imunan yettheggin akayad n BEM. Gar-asen 8 256 d arrac d 3 505 n tullas, ara yesɛeddin deg 57 n wammasen n usɛeddi. Ma d uṭṭun amatu n yinelmaden imunan yettheggin iman-nsen i ukayad n BEM, yewweḍ ɣer 19 352 n yinelmaden.
Gerrzen yigemmaḍ n ukraḍyur wis sin
Iberreḥ-d yiwen n wulɣu n teɣlift n usegmi d usedwel, belli igemmaḍ n ukraḍur wis sin fazzen ugar n ukraḍyur amezwaru n useggas-agi aɣurbiz 2018-2019. Tefka-d deg-s taḥawact n taggara n ukraḍyur wis sin, anida ara naf yuli s waṭas wuṭṭun n yinelmaden yesɛan agemmuḍ amatu yufraren ɣef 10 i yinelmaden n uɣerbaz alemmas d win n tesnawit. Ma d wid n uɣerbaz amenzu, sɛan tazmilt yugaren 5. Deg tesnawit, yewweḍ leḥsab ɣer 89,05 % ma deg uɣerbaz alemmas yewweḍ ɣer 96,04 % ula deg uɣerbaz amenzu yennerna leḥsab-agi, yewweḍ ɣer 90,62%.
…Ula deg Tizi Uzzu
Ula d inelmaden iɣurbizen n lwilaya n Tizi Uzzu, nnernan yigemmaḍen-nsen deg ukraḍyur-agi wis sin n useggas-agi aɣurbiz 2018-2019. Iberreḥ-d Mass Mohand Tachaabount, s yisem-is d imḍebber n teywelt deg Tenmehla n usegmi d usedwel n lwilaya-agi, yenna-d: “Nnernan aṭas yigemmaḍ n yinelmaden n lwilaya-nneɣ tikkelt-a, imi ulac aneḥbus ɣef leqraya, kullec yedda deg tegnatin yelhan”. Yenna-d daɣen: “Tiwwura n yiɣerbazen, llint ddurt iɛeddan i yinelmaden i wakken ad snilsen timsirin-nsen, yerna ad heggin iman-nsen ugar, mačči i uɣram n temsirin, imi ahil aɣurbiz ulac deg-s agellel. Ɣer taggara, yuɣal-d ɣer ukayad n waddal, yenna-d belli yettili-d usɛeddi-ines ussan-a, dɣa deg winna yerzan inelmaden imunnan n BAC, yetturaǧu ad sɛeddin 4 000 n yinelmaden deg 5 n wammasen n usɛeddi.
Adaoun Abdelghani