Tennerna-d taggara-a ɣer tɣamsa tɣerɣert-nniḍen n yisallen i d-yesneɣmisen deg wakud ilaw ɣef wayen iḍerrun di Tmurt Tazwawt abeɛda, maca daɣen ula deg umaḍal s umata. Aɣmis-a, yella s talɣa taliktrunikt kan, isem-is Vava-innova. Yettzemmil usemmi-a ɣef tikkelt iẓuran d yidles amaziɣ s umata akked umaynut di tallit-a n tatrara. Yettusemma, si tama yesmektay-d isem-is tizlit mechuren n Yidir » Vava-inu va », si tayeḍ iban-d d akken deg-s daɣen isekkilen imenza n wayen ibɣan ad d-yini « asnulfu » neɣ « abdaɛ » s tefransist.
Akka tura, yessawaḍ-d wadeg-a aliktrunik yisallen tilɣutin icudden i tmirent n yidurar d umaḍal merra, s waṭas n tezdeg d tsadart. Ɣas s drus n ttawilat, ɛerrḍen yilemẓiyen i yettarun deg-s ad ilin i walmend, ad d-awin isalli uɣdim i yiseqdacen n internet. Ad d-nesmekti d akken d yiwen n yilemẓi n Tizi Uzzu i yellan deffir usnulfu-is, lwaḥi d terbaɛt n yilmeẓyen-nniḍen. Deg wadeg-a daɣen, ttrasent-d seg tikkelt ɣer tayeḍ ula d timsirin n uselmed n tutlayt tazwawt, i yibujaden ladɣa. Ahat tamawt i nezmer ad d-nefk d ayen yerzan tutlayt tazwawt. Imi ɣas ma yella tesɛa amḍiq deg uɣmis-a maca, ar tura, mačči aṭas n yimagraden i d-yettwassuffuɣen di ddurt s tutlayt n Lmulud At Mɛemmer.
Ɣur yineḍfaren s taggayin-nsen yemgaraden, yehwa-asen s umata wayen d wamek i asen-d-tesselfay tɣerɣert-a isallen. « Segmi i d-yennulfa wadeg-a n yisallen Vava-Innova, uɣaleɣ ala deg-s i ssefqadeɣ ɣef wayen iḍerrun di Tmurt-nneɣ, d umaḍal merra », i d-yenna yiwen n yilemẓi si Bgayet.
M. Azwaw