«Teggeḍ tiyta ɣer yiɣes», d tanfalit i d-nnan yiselmaden n yiɣerbazen imezwura n twilayt n Bgayet deg usunded-nsen i xeddmen yal ass n arim di ddurt. Ineggura-a, εewwlen ad d-rren lhiba i yiselmaden n uɣerbaz amenzu i yenḍeṛṛen nezzeh, ladɣa wid n tutlayt taεṛabt. Refden ṛṛay belli ur sɣaṛayen ara yal ass n arim, armi d lawan ara tbeddel fell-asen teswiεt. Ad d-nesmekti d akken, ddeqs n yizerfan i ssuturen. Ama d asenqes n yisragen n uxeddim i yugaren 30 di ddurt, neɣ taεessast deg tneččiyin akked yibraḥen n yiɣerbazen.
Rnu ɣer waya, bɣan yiselmaden-a ad mtawan d wigad n uswir alemmas deg lexlaṣ, imi d yiwen n ugerdas i kesben. Ayen i ten-iceɣben daɣen, d ahil-a amaynut i ten-yerran d ixeddamen ula deg yixxamen-nsen. S unamek-nniḍen, aselmad n tutlayt taεṛabt, ilaq-as ad yili d amussnaw n uẓawan, d aselmad n waddal, n umezruy, tussna, d wayen-nniḍen. Ihi amek ara yekseb akud i twacult-is ma yella yettheggi-d ugar n 7 temsirin deg wass? Ɣef wakken ttwalin yiselmaden-a. Seg tama-nniḍen, furṣen yiselmaden-a tagnit n tnekkra n ugdud i wakken ad d-inin ula d nutni ur sliken ara seg lbaṭel n wid iḥekmen.
Γef usentel-a, tenna-aɣ-d yiwet n tselmadt: «Di tmura n umaḍal akken ma llant, fkan ccan d leqdeṛ i uselmad, acku aswir n tmetti yebna fell-as, abeεda win n uɣerbaz amezwaru. Imi yetturar nnuba n uselmad, d yimṛebbi di yiwen n lawan. Meεna di tmurt n Lezzayer, meḍlen-t netta d amuddir, kksen-as afriwen i umasay ɣef usegmi, i wakken ur ttilin ara wid iḥercen, d wagi dɣa i d iswi-nsen». I yisalli, asunded-a ur yettwaxdem ara di twilayt n Bgayet kan, meḥsub ula d tiwilayen-nniḍen, amur ameqqṛan i d-yerran i teɣṛi-a n usunded. Dɣa yewweḍ ufmiḍi-ines i ugar n 70%.
Ma S.K. tesḥassef aṭas s wawal-a: ‘’Ccil afmiḍi-a yeṣṣefṛaḥ, lameεna llan wiyaḍ i iqeblen tameddurt n ddel d lmerta i ttidiren yal ass’’. D ayen i yeǧǧan, dɣa, wid ixedmen asunded i waken ad asen-gren tiɣṛi anda i asen-nnan: «Ma yella tugadem ɣef yimukan-nwen, ilaq ad tegzum belli d nnif i yezwaren deg temsal am tigi. Ihi kkret seg tguni-nwen, acku win yebɣan ad tbeddel, ad yezwir deg yiman-is».
K. K.