Accueil Tamazight Yaḍra ad d-tili tfaska n Udrar n fad neɣ ala?

At Smaεel

Yaḍra ad d-tili tfaska n Udrar n fad neɣ ala?

69

Akken i nuɣ tannumi, tettili-d yal aseggas deg Wat Smaεel tfaska n tmedyezt. Deg-s dɣa ttemlilin-d yiḥeddaden n wawal seg yal Tawilayt, ttemḥizwiren gar-asen s lehdur iweznen iwumu ttaken ṛṛuḥ, ttuɣalen d asefru. D ayen i yeǧǧan ttiεad-a, yesεa lbenna d taxlaft ɣur yimedyazen d wid iḥemmlen isefra, acku, d tagnit ideg ttemlilint tektiwin, ttemḥennacen wulawen. Seg tama-nniḍen, d ttiεad i wid yettnadin tamussni, i wakken yal yiwen ad d-yagem sɣur wayeḍ. Daymi i t-ttraǧun yimedyazen s lḥir d ccuq. Lameεna aseggas-a, ffɣent tirga mxalfa, imi taẓrigt tis 18, d tajmilt i umussnaw Muḥend Akli Ḥeddadu, i d-yewwi ad tili deg meɣṛes yezrin, ur tettwaxdem ara.

Tamentilt n uwexxeṛ n tezrigt-a, d aṭṭan n Corona i ibeddlen abrid n ddeqs n tlufa deg umaḍal s umata. Ad d-nesmekti d akken tafeska ur telli n tmedyezt kan, meεna deg yiseggasen ineggura, yerna-d ɣur-s umsizwer n tullisin. Γef leḥsab n yimḍebbṛen n tddukkla Adrar n Fad, akken i d-berrḥen deg wayyur n meɣṛes yakan, ssarmen ad d-tili tezṛigt tis 18 mi ara yekfu lhem n Corona. Meεna, wissen ma yella ad d-tili teẓrigt n useggas-a, imi d tagrest i d-iteddun. Rnu i waya, iberdan yettawin ɣer tɣiwant-nsen, ur d wid yelhan. Seg tama-nniḍen, mazal anfafad n Corona ittaṭṭaf medden. Ihi asteqsi i mazal ur nesεi tiririt, d wa:  Wissen ma ad d-tili teẓṛigt n useggas-a neɣ ala?.

K.K.