Yegla-d umaynut n teɣdemt ussan n umenzu d kraḍ yennayer s yiwen yisalli yessefraḥen i lfayda n umɛellem ameqqran Isɛed Rebrab d umjahed aqdim Lexḍer Buregɛa, iwumi i dyella uḍlaq-nsen seg lḥebs n Lḥerrac ideg llan azal n sḍis wagguren-aya. Ass n 23 duǧember i ibed uselway n ugraw Cevital sdat n uneẓẓerfu, maca ur ḥkimen ara fell-as, imi rran-t ɣer umenzu yennayer anda i ḥekmen fell-as s sḍis n wagguren, netta tuɣi-t yakan yessezri qrib tmanya wagguren di tkurmut, ɣef waya yella-d userreḥines.
Ma d amjahed ameqqran Lexḍer Buregɛa, yella-d userreḥ-ines seld mi izad fell-as waṭṭan ussan-a ineggura, anida i yexdem snat tikkal aparasyun di sbiṭar n Mesṭafa Baca, syin yettuɣal ɣer lḥebs, imi urɛad i tsɛeddan sdat n ccreɛ. Acu kan leḥriṣ i itteg ugdud i d-yetteffɣen s yiberdan deg yakk tamiwin ussan n sem ɣef udabu, yeǧǧa-ten ad as-d-ḍelqen, maca ad iɛeddi di ccreɛ ass n 12 meɣres i d-iteddun. Isallen-a sferḥen mačči d kra aɣref azzayri, imi ẓran, akken i qqaren, d akken di lbaṭel i kecmen sin-a n yirgazen, ma d asuffeɣ-nsen ɣef wakken walan wid yettabaɛen addad amiran n tsertit, ad dyeglu s lfayda i tmurt s umata.
Ma neẓra belli Isɛed Rebrab ixeddem leqdic meqqren s tkebbaniyin-is yellan deg waṭas n yimeḍqan i d-igellun s ubaɣur i tdamsa taɣelnawt, d umḍan meqqren n yixeddamen i yessexdam ladɣa seg yilmeẓyen. Ma d amjahed Lexḍer Buregɛa yettwassnen di lweqt-nni n tegrawla s uttekki-ines d temlilt-is armi teffeɣ Fransa tamhersant, ɣef wakken walan medden ur yuklal ara ad d-yegri di tkurmut ɣef 85 n yiseggasen di leɛmer-is. Ɣef waya i ssarmen ad d-yili usuref fell-as deg meɣres-agi sdat-neɣ.
I usmekti, aṭas n yilmeẓyen-nniḍen yettwaṭṭfen ɣef wannay amaziɣ i dyeffɣen u mazal yettili-d userreḥ-nsen, gar-asen tilemzit Samira Messusi. D ayen i yeǧǧan ciṭ n usirem ad yadef ɣer wul n ugdud i iḍemɛen ad d-tili tlelli n teɣdemt s tin n tidet di tmurt n Lezzayer i wakken ad ddun lecɣal n tmurt akken i ilaq.
Kh. A