Segmi yekfa uxeddim deg umḍiq-a iwumi qqaṛen Ɛecba di tɣiwant n Xeṛṛaṭa, aṭaṣ n medden i irezzun ɣer dinna. Ayagi imi ccbaḥa n ugama deg-s tugar tilisa, ladɣa imi mmlalen yidurar mcubbken. Rnu i waya, abeḥri dinna d azedgan yettara-d ṛṛuḥ i win i t-yesṛuḥen. Kra n win i iḥebsen deg-s, ad yecreh wul-is s yibkan i yellan dinna. Lameεna tikkelt-a, teffeɣ targit mxalfa. Imi ass n, 15 ctembeṛ yezrin, yegla umḍiq-n s terwiḥt n yiwen n yilemẓi, i yellan akked umeddakkel-is. Aneggara-a dɣa yeslek, ɣas ma yella yuɣ-itent akken ilaq. Γef leḥsab n tnagiwin n wid i iḥeḍṛen, d sin n yilemẓiyen seg twilayt n Ṣṭif, i yeɣlin (grarben) seg ṭṭuq n Ɛecba.
Dɣa yiwen deg-sen yesεa 22 n yiseggasen yemmut, ma d wayeḍ, a-t-an di yir liḥala di sbiṭeṛ. Ad d-nesmekti d akken ar tura mazal ur d-tban tiqqit ɣef temsalt-a, imi tamentilt n usehwu-a mazal ur d-tban ara. Yal yiwen amek yeqqaṛ: Yiwen yeqqaṛ d amennuɣ gar-asen, wayeḍ yenwa d nutni i yibɣan ad nɣen iman-nsen, daymi i d-usan ɣer dinna, jelben seg ṭṭuq-nni. Iqeddacen n Uḥuddu aɣarim, xedmen axeddim-nsen, imi ssuffɣen-ten-id, ssalin-ten-id i ubrid usawen. Syin, wwin-ten srid ɣeṛ sbiṭeṛ n Xeṛṛaṭa. Ma yella d iɣallen n laman, ldin anadi imir-n, di leεḍil ad d-tban tidet.
K. K.