Mazal taluft n yinɣiman (suicide), tgellu-d s lerwaḥ n yilmeẓyen deg temḍiqt-agi n Mεatqa, i yellan yakan deg tazwara deg umḍan n yinɣiman deg lwilaya n Tizi Uzzu. Deg wass n letnayen iεeddan, 29 deg wagur n yebrir 2019, i yenɣa iman-is ( S-F), d ilemẓi n 27 n yiseggasen, n taddart n At Aḥmed i ibaεden s sin (02) n yikilumitren ɣef tlemmast n tɣiwant n Mεatqa. Deg wass-nni n letnayen ɣef lewhi n tmeddit i yufan yemsebriden ilemẓi-agi yenɣa iman-is s tmuxniqt, deg umḍiq n Buḥmdun, anda yuɣ tannumi yettɣama d imeddukkal-is, yerna yexdem addal. Syin, sɛelmen yimsebriden iɣallen n usellek d srabes n llaman, i yewwin ilemẓi ɣer sbiter Nedir Muḥamed n Tizi Uzzu akken ad nadin ɣef ssebba n lmut-is. Yeɣli-d leḥzen d ameqqran ɣef yimezdaɣ n taddart n At Aḥmed d imezdaɣ n tɣiwant n Mεatqa. Taluft-agi yettḥazen ilmeẓyen yal aseggas, tuget deg-sen ur εeddan ara i 30 n yiseggasen deg leεmer-nsen, teǧǧa-d ticraḍ ɣer yimezdaɣ n Mεatqa. Dɣa, ar ass-a, imḍebbren teεna temsalt, ur d-cliεen ara deg taluft yecban tagi, imi mazal amḍan meqqren n yinmeẓyen yeḥwaǧǧen tallelt n imejjayen n tnefsit, i d-yewwi ad bdden fell-asen akken ad d-ttwakksen seg yir tilufa, anda imawlan-nsen, ur zmiren ara.
Ali Zalouk