Accueil Tamazight “Yezga Tahar Djaout gar-aneɣ deg leqdicat n taddart’’

Akli Gasmi, d ameddakkel n Tahar Djaout

“Yezga Tahar Djaout gar-aneɣ deg leqdicat n taddart’’

74

Gar yimeddakkal n Tahar Djaout, yella Mass Gasmi Akli, d mmi-s n taddart-is. Nesteqsa-t fell-as, ha-t-an wacu i aɣ-d-yenna. ‘’Yal mi ara d-mmlileɣ deg tcemlit akked yimezdaɣ n taddart n Wulxu, yettili-d wawal ɣef Tahar Djaout imi yezga gar-aneɣ deg leqdicat n taddart, yecban afras n yiberdan, asizdeg n tliwa, asicbeḥ n yimekwan n yiɣimi akked wayen-nniḍen. Iḥemmel, ad d-yas ɣer taddart-is. Yettaf iman-is gar wid-is, ladɣa mi ara xeddmen ticemliyin d wansayen n tama-agi. Ula deg wayen yura deg tsekla, ad naf amur ameqqran icudd ɣer tudert-is gar wid-is. Am yineggalen imḥaddiyen, Tahar Djaout yura tanagit-is ɣef tudert taqessḥant d lbaṭel i tesɛedda tniddas. Deg ungal ‘’L’Exproprié’’, yettnadi umeskar deg uḥric n tmagit. Ma d ungal ‘’Les Chercheurs d’os’’ i isehlen i tɣuri s talɣa tafessast ma neqren-it ɣer umezwaru, ad naf d akken iḥekku-d Tahat Djaout deg tazwara ɣef tudert-is deg taddart deg lweqt-nni n ṭṭrad. Iwudam i d-yudder, llan deg tallit-nni, ala yiwen. Madal. Yenna-yi-d : ’Yiwen wass, ufiɣ-d akamyun deg ubrid yeḥbes, yugi ad yelḥu, isem-is Madal’. Ma deg uḥric wiss sin n wungal, yewwi-d awal ɣef ubrid i wwin yimnadiyen i wakken ad d-skeflen iɣsan n yimeɣras i yeɣlin deg unnar n yiseɣ. Abrid i isehlen ad t-twaliḍ imi yettemcabi deg tilawt ɣer wayen yellan deg tudrin akked tɣaltin. Deg wungal Les Vigiles, yefka-d umeskar tamuɣli-s ɣef tmetti tazzayrit mbeɛd timunent. Yebda allus s yiwet n twaɣit i ddren yiɣermanen s ddaw lbaṭel n temhersa n fransa. Deg yiwen unejmuɛ, yeffeɣ leɛqel userdas afrasis, dɣa yenɣa yiwen udeic’’.
Yesteqsa-t Hocine Moula