Accueil Tamazight Yugurten n Farida Sahoui

Ajdid deg tira

Yugurten n Farida Sahoui

150

Yugurten, d adlis amaynut i d-yernan deg wussan-a ɣer temkerḍit n teqbaylit ad tiwsiɛ ugar skud ma llan wid yesɛan lebɣi n tira s leḥmala n tutlayt-nsen tayemmat. D adlis yerzan taɣult n umezruy i d-yewwin ɣef ugellid anazbay n Yimaziɣen “Yugurten”. D tameskart Farida Sahoui i yellan deffir leqdic-a. Ma neẓra yella yakan udlis-a s tutlayin n tefransist d taɛrabt i tga tmarut-a yakan s uzwel “JUGURTA, Histoire d’un peuple”, d ayen i tt-yeǧǧan ad teɣtes, ad t-tessali s tutlayt-is n tyemmat tamaziɣt, imi ulamek ara d-yeffeɣ udlis ɣef yiwen seg yigelliden Inumidiyen n Yimaziɣen am Yugurten s tutlayin-nniḍen, bla ma yeffeɣ-d s tutlayt n tmurt d wakal iɣef iḥureb Yugar-iten.

Deg udlis-a, ad naf Farida teḥka-d ɣef talliyin yemgaraden di tudert n Yugurten, am ṭṭrad-is mgal Roma, tuṭṭfa-ines s usenzi d usekcem-is ɣer lḥebs di temdint-a n Roma armi yemmut din. Adlis-a, ad d-yernu abaɣur s wazal-is i tsekla n teqbaylit neɣ n tmaziɣt s umata, acku ɣef umezruy i d-yewwi, d ttbut ara ideggren Izzayriyen ugar ad issinen amezruy-nsen s telqey. Tlul Farida Saḥwi deg useggas n 1972 deg temnaḍt n Yiɛeẓẓugen.

Tura yakan yiwen n udlis i d-yeffɣen aseggas n 2017 s uzwel “Tiwaculin n leqbayel n Lezzayer di tmurt n Tunes”. Adlis n tikkelt-a, yeffeɣ-d ɣer teẓrigin “Asirem”, ad t-naf imir-a deg waṭas n temkerḍiyin n tmurt n leqbayel am tnedlist Cheikh deg temdint n Tizi Uzzu, tinedlisin Tessa Livre d Bouraine deg Yiɛeẓẓugen d Yiɛekkuren, yettnuzu s wazal n 300 idinaren. Yelha win ara t-yeɣren, ad d-yessekfel u ad d-yegmer ugar n yisalen ɣef uwadem-a amazray.

Kh. A.