Am yilindi dɣa, d yiseggasen-a ineggura, yuqa ayendin useggas-a ubelluḍ di tɣiwant n Ayt Smaɛel, i yeggugen s wazal n 65 n yikilumitren ɣer unẓul-asamar n waɣir n Bgayet. Ma nemmeslay s wudem amatu, txus mliḥ tmegra i d-yellan sɣur kra n yimezdaɣ i yettawi ubrid ɣer teẓgi d lexlawi, wamma aṭas iwumi ur tettunefk tegnit ad d-kksen agummu-a seg tbelluḍt akken llan xeddmen zik. Ɣas caḍent tmentilin n waya, yeɛreḍ yiwen n umezdaɣ ad d-yawi awal ɣef kra seg-sent. «Agummu n ubelluḍ ɣur-nneɣ, si zik yella di lexlawi d umadaɣ ibeɛden.
Din i t-ẓẓan yimezwura acku itteṭṭef littaɛ rnu iqeffel akk ddeɛwa. Ihi akken ad t-naweḍ, ad d-nekkes, ilaq ad nerzu s amadaɣ. Tura imdanen ur rezzun i tẓegwa akken yella lḥal di talliyin yezrin», i d-yenna. Send ad isemmed: «Ur ilaq ad nettu ayen akk yettwagezmen d tibelluḍin, ama sɣur yiɣermanen neɣ sɣur yinesdabuyen i ixeddmen iberdan, iɣiwanen abeɛda. Nezmer ad d-nini, yerna waya tuɛert i tukksa n ubelluḍ, acku ddeqs seg tid yellan qerbent i umdan, ttwahuddent».
Seg tama-nniḍen, ɣas ur ssawḍen ad t-id-kksen seg yidurar ɛlayen, am Yigemmunen d Waguf, llan yimezdaɣ i t-id-yuɣen d tiɣin seg ulzuz. Ahat llan wid yennumen tetten-t d azegzaw, maca llan wid iḥemmlen ad t-id-zzun ɣef uskir deg uxxam. Abeɛda ma yella d abelluḍ aḥrur, mačči d aweḥci. Seg tama n ubaɣur i tfekka n umdan, yelha aṭas ubelluḍ i tuččit, imi deg-s tivitaminin, akalsyum d umanyizyum. «Taggara-a, yewɛer fell-aɣ ad naf abelluḍ ɣas d lawan-is, maca nessawaḍ nettaɣ-id-id si leswaq neɣ sɣur wid yesnuzuyen deg yiberdan», i d-yenna yiwen n umezdaɣ n Ayt Smaɛel.
M. K.