Accueil Tamazight Zrin 62 n yiseggasen ɣef tmenɣiwt n Abane Ramdane

Asmekti - Yella d amasdag n Ugraw n Ṣsumam

Zrin 62 n yiseggasen ɣef tmenɣiwt n Abane Ramdane

72

Yettusemma Abane Ramdane deg umezruy d ababat n tegrawla n Lezzayer. Yettwanɣa ass n, 27 deg duǧember 1957, deg Merruk. Yufrar-d Abane Ramdane ɣef wiyaḍ deg tegrawla n 1954 deg uḥric-agi n tsertit imi yettuneḥsab d netta i iseddan aḥric-agi akken iwata. Ladɣa deg uheggi n Ugraw n Ṣsumam netta akked Larbi Ben Mhidi anda i d-heggan lsas i tlallit n wawanek azzayri. Awanek anda ara ad yifrir umdan n tsertit ɣef userdas. Dayen, ahat, i d-yeṣsawḍen timenɣiwt-is deg useggas n 1957.

Tameddurt-is

Ilul Abane Ramdane ass n, 10 deg yunyu 1920, deg Yiɛezzuzen, deg tɣiwant n Larebɛa n At Yiraten. Iɛac deg yiwet n twacult tigellilt. Yewwi-d agerdas n BAC deg useggas n 1941 deg temdint n Blida. Yebda leqdic asertan deg ukabar PPA asmi yella deg temdint n Celɣum Lɛid. Mbaɛd tidyanin-nni n 8 maggu 1945, yekcem ɣer PPA-MTLD. Deg useggas n 1948, yuɣal d aɣella n lwilaya n Ṣṭif, syin deg Wehran. Yella diɣ deg tallit-a, d aɛeggal n Tuddsa tusligt OS n ukabar-agi. Yettwaṭṭef ɣef waya deg useggas n 1950 sɣur Fransa.

Ḥekkmen fell-as s 5 n yiseggasen n lḥebs. Yebda seg lḥebs n Bgayet, barberousse, Maison Carrée d berra n tmurt. Mi d-yeffeɣ deg lḥebs ass n, 18 deg yennayer 1955, yesɛedda kra kan n wussan akked twacult-is, syin iruḥ ɣer Lezzayer tamanaɣt anda yuɣal d aqerru ɣef tenmehla tasertant. Imir diɣ i d-iger tiɣri i tdukli n uɣref azzayri i d-yeslalen Amussu aɣelnaw. Am wakken i yella d assaɣ gar lwilayat n tmurt akked teseqquma n beṛra n FLN deg Maṣer, deg Fransa, Merruk akked Tunes. Yelha-d diɣ d usddukkel n yiɣallen isertanen ɣer FLN i wakken ad yili d Amussu ameqqran anazbay.

Ɣer tama-s Ben Youcef Ben Khedda, yexleq-d aɣmis El Moudjahed, imsiɣret Kassamen…Am wakken i yefka afus n tallelt deg tlallit n tuddsiwin yecban UGTA, UGCA, UGEMA.

Agraw n Ṣsumam

S lemɛawna n Larbi Ben Mhidi, yessaweḍ ad yexleq aẓayer (statut) i lɛesker (ALN) deg Ugraw n Ṣsumam deg 20 ɣuct 1956 anda « ara d-yifrir userti ɣef userdas, win yellan daxel ɣef win yellan deg berra ». Yettusemma deg temlilit-a d aɛeggal gar 5 n yimḍebbren ara iseddun leryul n tegrawla i d-yeffɣen deg Ugraw. D netta, diq, akked Larbi Ben M’hidi, yacef Saadi i d-yesneddhen amennuɣ ameqqran yeḍran deg Lezzayer Tamanaɣt.

Deg useggas n 1957 mi yettwanɣa Ben M’hidi, iruḥ Abane ɣer Tunes anda i d-yemmuger uguren akked kulunilat n ALN. Yettwaṭṭef deg txazzabit i as-undin Krim Belkacem, Abdelhafid Boussouf, Lakhdar Ben Toubal s tallelt n Ben Bella, syin yettwanɣa ass n, 27 deg duǧember 1957, deg temdin n Ṭiṭwan n Merruk.

Hocine Moula