Tasebḥit n wass n lexmis, 06 deg furar 2020, gren-d akken ma llan ixeddamen n Uxxam tɣiwant n Mizṛana yellan di dayra n Tegzirt, yiwen uɣejdim n teskant, si tsaɛet tis ṭamet (08) armi d tis tẓa (09), sdat n tewwura n Uxxam tɣiwant. Deg-s, ssuturen I wakken ad yili cwiṭ leqdeṛ fell-asen, mi xedmen amahil-nsen di tnarayin, neɣ deg yimukannniḍen. Tiɣri-agi i d-gren ur terzi ara kan wid iqeddcen daxel n uxxam, ula d isemrasen iqeddcen di berra, deg yiberdan ssuturen ula d nutni akken ur d-tettili ara tzernant fell-asen s ɣur imsebriden, wa ad asen-fken tamuɣili akken iwata.
Acku d nutni i iɛettben i wakken ad tili tezdeg deg tzenqatin d yiberdan n tɣiwant. Ula d imezdaɣ n tɣiwant-agi yellan mgal ṛṛay-agi, rnan-d ɣer yixeddamen akken ad siwḍen tiɣṛi-nsen ula d nunti. Refden yixeddamen d yimezdaɣ aṭas n yiberriḥen i yuran di tferkiyin, gar-asen « Ala i tzernant n yixeddamen » , « Tanemmirt n uxeddam s nnig n wazal » , « Nukni d ixeddamen mačči d aklan ɣef yimdanen »…ar taggara.
Yemesslay-d yiwen deg-sen yenna-d: «Assagi, nefefɣ-d ɣer dagi akken ad neḍleb i yal amdan, ad aɣ-d-yefk lqima, nekni d ixeddamen ɣef warraw-nneɣ”. Yerna-d wayeḍ : «Aql-aɣ dagi, akken ma nella kif-kifaɣ, d ixeddamen yakk, ur yelli lxilaf nekni d atmaten, nebɣa imdanen ad aɣ-d-fken afud ». Ixeddamen-agi, ssaramen izen-nsen iɛedda, yewweḍ ɣer yimdanen.
Y. M.