Mbeɛd mi tettwazgel tezrigt n yilindi, imi ur tettwaxdam ara, yuɣal-d sser taddart n Lemṣella, imi i d astuɣal tmeɣra-s n tbexsisin i dttheggin yal aseggas. Yewweḍ-d lawan n tezrigt tis 12 n tmeɣra-a, kullec yettwahegga deg taddart n Lemṣella i usterḥeb s yinebgawen-is n lɛez d lḥerma. Acḥal-a, segmi yebda uheggi-ines sɣur yiɛeggalen n Tddukkla “Tiɣilt” n taddart-agi n Lemṣella, i wakken ad ssiwḍen ad suddsen tazrigt tis mrawet d snat (12) n tmeɣra n tbexsisn.
Ad tili tmeɣra-agi di tezrigt-is tamaynut, ussan n 29 akked 30 ɣuct 2019, ddima deg taddart-agi n Lemṣella, yettwassnen mliḥ s tneqlin. Ahil n tezrigt-a tis 12, ad yili d anesbaɣur, am tid-nni iɛeddan ama si tama n yirmad idelsanen ama si tama n temsikniyin. Aṭas n yimsikniyen ara yilin di ttiɛad, gar-asen wid n tqendurt, wid n usɣar, wid n tamemt…atg, ara d-yerzun si tuddar-nniḍen ɣer tama n wat taddart-agi, ara d-iseknen leṣnaf n tbexsisin yemxalafen. Mbeɛd tullya tunṣibt ara d yilin ass n lexmis ɣef 10h00 n ssbeḥ, ad tebdu temsizzelt n wunuɣ ara yilin di yal azniq n taddart.
Tin ɣur-s, d asarag akked uskasi ɣef yibaɣuren n lɣella-a, syin akkin, ad fken tagnit i uskan n zzwaǧ aqbur n yimaziɣen akked ccna sɣur tarbaɛt n taddart. Ma ɣer yiḍ, ad tili tmeɣra n ccna akked waṭas n leqdicat-nniḍen idelsanen. Ad ikemmel wahil azekka-in n lǧemɛa, s temsikniyin, s tegnit n ccdeḥ aqbayli, asihar n useḥḥar. Asenɛet n wansay anẓar, afran n tfelwit n teklut igerrzen deg temsizzelt-nni n wunuɣ. Am wakken daɣen, ara d-tili temsizzelt n ccna i yilmeẓyen, ad isali leqdic-agi s tmeɣra n taggara. Di taggara, ad d-nini belli leqdic adelsan, ad yettwasuddes sɣur ddeqs n yidisan, ad d-nebder gar-asen; Tiddukkla tadelsant Tiɣilt n taddart n Lemṣella akked teseqqamut n taddart-agi d waṭas n yidisan-nniḍen.
Adaoun Ghani