Lḥan yinelmaden n tesdawit Akli Muḥend Ulḥaǧ n Tubiret di ddurt tis 45 n umussu asdawan. Bdan-d tikli deg tesdawit armi d amkan iwumi qqaren La place s lmendad n umazday ilelli n yinelmaden d win n tnelmaden s umgired n tektiwin d iberdan, maca s yiwen yiswi i tlelli d tugdut. Tikli i dyebdan ɣef 10 h, tella-d di tegnatin yelhan aṭas, di talwit tameqqrant anda ɣer tama n yinelmaden, lḥan-d aṭas n yimeɣnasen-nniḍen akken ad fken afud-nsen s yisuɣan am « Pouvoir assassin », « Lezzayer, d tilellit d tamagdayt neɣ d taɣarimt mačči d taserdast » d tuɣac n tegrawla am « Ǧǧet-aɣ abrid ad nεeddi ».
Ssuturen yinelmaden, diɣ, tilelli n yimeḥbas n rray, aqlaε n udabu seg yizuran d zariεa yeẓẓa di tesdawiyin tigi d tuddsiwin yeskuffren tilelli d tugdut, asnerni d tussna. « Walit kan anda llan wid zaεma yettnaɣen ɣef yinelmaden wid iḍeggren tasdawit s aḥemmal, tura ffren acku tewweḍ-d tidet s amnar. Ihi tura, d lawan n ubeddel», i dyenna yiwen n unelmad n tdamsa. « Uqbel ad nessuter ayen-nniden, ilaq ad d-brun i yimeḥbas n ṛray, imir-n ad nemmeslay ɣef wayen-nniden», i dterna yiwet tnelmadt n ugezdu n tmaziɣt. Γas d imuras, maca tikli meqqret imi i umennuɣ ulac imuras i d-beggnen yinelmaden n tesdawit Akli Muḥend Ulḥaǧ.
Nisma Tigrine