I tikkelt tis 30, lḥan yinelmaden n tesdawit Lmulud At Mɛemmer n Tizi Uzzu ass n aram, 17 cutember 2019, i wakken ad d-inin ‘’Ala i tefranin n 12 duǧember’’, ‘’Ala i tmuḥqranit n yineɣmasen’’, ‘’Ilaq aserreḥ n yimeḥbas n rray d tsertit, ‘’Tamurt taɣermant mačči taɛsekriwt’’. Tella-d tikli si tesdawit n Ḥesnawa ɣef 11h, tekfa di tmersiwt taqdimt neɣ afrag n Tcemmuɛt, akken i as-semman tura. Äṭas n yimdanen i d-yerran i teɣri n yinelmaden u lḥan s idis-sen. D tulawin neɣ d irgazen, dduklen i wakken ad sbeggnen tamuɣli-nsen lqayen deg umussu aɣerfan yebdan seg 16 di furar iɛeddan di temdint n Xerraṭa deg lwilaya n Bgayet. Mi wwḍen ɣer tcemmuɛt, yal wa, yenna-d awal-is, ama d inelmadnen, ama d “inebgawen”, syin, fkan ttiɛad i tikkelt-nniḍen u mmsefraqen deg talwit, mbeɛd mi i d-yeɣra yiwen asefru n Matoub Lounes
« Ulac assif i d-iḥemmlen,
Ur nris ara ywwass.
Xas ad ɣlin yirgazen,
Ur gellun-t ara tissas.
Ad nqabel ussan berriken,
Ad yaweḍ lweqt ad fakken,
Ad-aɣ yeḍleq lweswas.
Ad yens ujajiḥ yekkren,
Ad nefḍen wid tt-ixerzen,
Ɣur-wat win igezzmen layas »
Dahlal Chanez