Mebɛed mi d-yella umcawer gar teɣlift n usegmi taɣelnawt akked sandikat n uḥric-agi n ttrebga, dayen gezmen-tt di rray belli azemz unṣib n ukayad-agi n taggara n ulmud n tesnawit BAC. Akken i t-id-tbereḥ yis-s tneɣlaft n usegmi aɣelnaw Massa Benghabrit Nouria, akayad-agi ad d-yili usɛeddi-ies seg19 alamma 24 yunyu 2018, annect-agi yebɣa ad d-yinni belli mbeɛd aggur n Remḍan u deffir n lɛid tameẓyant s kra kan n wussan.Ulamma niqal akayad-agi, yettujerd di lejrida n yikayaden n taggara n useggas aɣurbiz 2017-2018, ad d-yili uqbel aggur n Remḍan, maca tikkelt-agi, tefka Massa Benghabrit tagnit i yinelmaden d yimawlansen d twacult n usegmi s umata, i wakken ad fernen gar sin-agi n yizemzan: amezwaru seg 3 alamma d 7 yunyu, wis sin seg 19 alamma 24 yunyu 2018. Acu kan tuget n yinelmaden fernen azemz-agi aneggaru n deffir waggur n Remḍan. Annect-agi, yusa-d imi ssuturen yinelmaden d yimawlan-nsen deg sin n yiseggasen-nni iɛeddan, ideg sɛeddan imsizwren deg waggur n Remḍan yerna lawan n lḥamu, dɣa aseggas-agi tcawer-iten ɣef wazemz unṣib n ukayad-agi. Tuget n yinelmaden d yidisan yemxalafen yettabaɛen ɣer uḥric n usegmi fernen ad d-yili usɛeddi-ines seg wass n 19 alamma d 24 yunyu 2018. Ma ɣef wayen yerzan, afran n yisental, tenna-d Massa Benghabrit deg wussan iɛeddan: ‘’ula d aseggas-agi, sin n yisental ara yilin s lxetyar, akud daɣen uzzig n yal tanga ad yeqqim akken yella’’. Ma d uṭṭun n yimsizwiren yetturaǧun ad sɛeddin akayad-a n taggara n tesnawit, yewweḍ aseggas-agi ɣer 709.000 n yinelmaden ara yilin di ttiɛad ass n 19 yunyu 2018.
Ghani Amazigh