Di lawan anda i bdant kra n tɣiwanin n twilayt n Bgayet aseqdec n lgaz agaman, neɣ lgaz n temdint, llan tiyaḍ yeffeɣ-asen-id uṣenfar-a n lgaz, meεna mazal ur kfan lecɣal n uheggi-s. Amedya n tɣiwanin-a, d tin n At Smaεel. Seg tama-nniḍen, llant kra n tɣiwanin-nniḍen, mazal ur d-yeffiɣ ara uṣenfaṛ-a n lgaz ɣur-sent. Am tin n Tsexriwt, d tin n Yiderginen. Tiɣiwan-a i d-nebder, iεedda umḍan n yimezdaɣ deg-sent 30 000. Yerna amur ameqqṛan n tuddar-nsent, zgant-d deg yidurar.
S unamek-nniḍen, qessiḥ nezzeh tudert deg-sent. Ladɣa deg tegrest imi aṣemmiḍ igezzem. Rnu i waya, mi ara ad yewwet ugeffur, neɣ d adfel, imesdurar sεeddayen lmeḥna taberkant, i wakken ad ṣṣiwḍen taqerεet n lgaz ɣer yixxamen-nsen. D ayen i ten-yeǧǧan acḥal d iseggasen-aya, nutni ssuturen lgaz-agi agaman imi, ahat ad tifsus fell-asen teεkemt cwiṭ. Imezdaɣ n tɣiwanin-a dɣa, fuṛṣen tagnit n tirza n uneɣlaf n tezweṛt (Energie) i twilayt n Bgayet, xedmen anejmuε sdat n uxxam n twilayt, i wakken ad ḍelben izerfan-nsen.
Imir-n yefka-asen-d awal uneɣlaf-a, belli ad asen-yefru aɣbel-nsen s uɣiwel. Lameεna ar ass-a, ugar n useggas i iεeddan, mazal ur d-iban tiqqit. Γef usentel-a yenna-aɣ-d yiwen n urgaz seg tɣiwant n tsexriwt: « Nukni, ass-a, nebɣa ad negzu, d anwa i d amasay ɣef uεeṭṭel-a. Ma d imḍebbṛen n twilayt n Bgayet neɣ d wid n tɣiwant-nneɣ? Acimi i tettwakkes tɣiwant-nneɣ seg umuɣ n tɣiwanin. Aredmani, ur nberru ara i temsalt-a ḥacama tefra. Imi mačči d lmuḥal i nessutur, wagi d azref seg yizerfan-nneɣ ».
K. K.