Taswiɛt ur tessefraḥ ara deg tmurt n Lezzayer. Rennun-d yimuḍan seg wass ɣer wayeḍ. yewweḍ leḥsab ɣer 4 295 n liḥalat n wid ihelken aṭṭan-a. Mmuten 459 n yimdanen. Ma deg lwilaya n Tizi Uzzu, yeṭṭef Convid-19 132 d amdan. Mmuten 22 segmi i d-yebda waṭṭan-agi. Ḥlan azal n 64 d amdan. Xas ulamma yella-d uɣlaq n tḥuna deg ussan iɛeddan, maca ttkemmilen yimezdaɣ ttefɣen-d, ur ttqadaren ara akman. Tkemmel tegnit tettibrik ladɣa mi akka yeldi wumur ameqqran deg Remḍan-agi. Yal ass, yettnerni wuṭṭun n wid i yeṭṭef Covid-19. Yennul akk lwilayat n tmurt, xas ulamma yeṭṭqqet deg 4 neɣ 5 lwilayat, yecban Blida, Lezzayer tamanaɣt, Tipaza, El Burǧ…atg.
Ɣef wakken ttwalin kra, yewweḍ waṭṭan-a ɣer uswir wis n twaɣit. Xas ulamma nnan-d yimḍebbren, nezmer ad nqabel taswiɛt, maca di tilawt d ayen yakk yemmxalafen, acku sbiṭarat n tmurt, ur gerzen ara, imejjayen, ur sɛin ara ula d allalen imectaḥ akken ad ḥadren ɣef yiman-nsen. Ihi, yewɛer i wakken ad ḥarben ɣef umuḍin. Ɣef waya, dɣa, i xeddmen, ussan-nni imezwura, yimejjayen n sbiṭer Mohemmed Boudhiaf n Tubiret, yiwen n usunded akked unejmuɛ, akken ad wwten s leqseḥ ɣef liḥala deg-i ttqabalen imuḍan, maca ulac tiririt i tiɣri-nsen, ɣef wakken i d-nnan. Seg tama-nniḍen, ula d imdanen ur ttqadaren ara iwellihen i d-fkan wat n tdamsa, imi mazal ttnejmaɛen, ttemlilin gar-asen ama deg tḥuna neɣ yiberdan, xas akken d imeyyaten i ittahlaken yal ass.
Yamani Souhila