Mačči d tikkelt, mačči d snat i ḍrant temsal-a deg yiberdan armi amḍan n yisehwa irennu seg wass ɣer wayeḍ. Ayagi tamentilt-is ahat seg yiwet n tama d iberdan ixesren, lameεna seg tama-nniḍen, ula d inehhaṛen ur ttqadaren ara akk iṣuḍaf n tenheṛt.
Nezmer ad d-nini d akken ula d talsawit ur tnuḥ deg kra n wulawen n wid yesseddayen tikeryas, acku ur ttḥadaren ula mi ara nehhṛen di tuddar, anda i ttilin warrac imectaḥ. Daymi i d-ttilin yisehwa i igellun s terwiḥin n yineglusen, i d-yeldin melmi kan allen-nsen di tudert. Amedya, d taqṛuṛt B. Aya seg tɣiwant n Sedduq, i yesεan kan 4 n yiseggasen di leεmeṛ-is.
Aya teddhem-itt tkeṛṛust sdat n uxxam-nsen, temmut imir-n imi d tiyita qeṛṛiḥen i tečča. Ad d-nesmekti d akken tadyant, teḍṛa ass n acer, 28 yulyu yezrin, yerna mačči d tamezwarut di twilayt n Bgayet imi, i usmekti, ula di tɣiwant n At Smaεel, sin n yiṣinaṛyuyen i yeglan s tudert n warrac imectaḥ ilindi. Ccil akken qqaṛen lmut s tacaṛt, meεna deg temsal am tigi, aḥader yeɣleb aqader.
Ula d taɣdemt ulac di tmurt-a, wama amek ara ineɣ yiwen alufan, syin ad ikemmel tudert-is mebla aḥaseb ? ihi yewwi-d ɣef wid teεna temsalt ad d-ssufɣen aṣaḍuf ara ten-iḥeṛmen ama seg tnehṛa, neɣ seg yizerfan-nsen-nniḍen, ahat ad ḥebsen yisura-a.
K. K.