Askan n wungal
Azwel n wungal : « Tamurt Yeččan arraw-is ». Yeffeɣ-d ɣer tezrigin TAFAT deg useggas 2019. Tawlaft n tjellabt n wungal d unuɣ ittwastenyan sɣur ILADIS, deg yid-is n ufella isuneɣ argaz d tmeṭṭut ddaw-nsen 5 n yilemẓyen.
Tameddurt n umaru
Sidɛli Lahdir, d amyaru ilemẓi. Ilul ass, 24 yebrir 1988, deg Uqbu. D aselmad n tutlayt n tmaziɣt, yettheggi daɣen Doctorat n tmaziɣt deg tesdawit n Mulud Mɛemmri. Yesɛa yakan ungal amezwaru « Tirga n wul» i d-yeffɣen deg useggas 2018 swayes dɣa yewwi Arraz Racid Ɛellic i d-tettheggi tesbeddit Tiregwa n tmurt n Kanada.
Agzul n wungal
Ɛemran akked Sakina, nutni akked uhember zgan, tudert teffeɣ-asen-d Ɛinani. Rnan ɣef twenza xemsa n tarwa. Samiya d yelli-tsen, aɣerbaz iḍeqqer-itt-id ; d axxam i as-yegren irebbi. Sakina, tettḥawal-as leqdic akken ad as-tessekreh axxam, ad teffeɣ ad teg ttawil i yiman-is. Asmi yura ad teffeɣ, yeḍḥa-d yeǧǧa-tt zzman, nettat akked tmetti yewɛer ad telḥem. Ɛmer, mazal-it yeqqar. Asmi i t-id-slaqben s laẓ-is ; yeǧǧa azmam, itteḥraq lakul akken ad iruḥ ad yexdem, ad d-yer iseɣ i twacult. Yefka tarwiḥt d asfel ; Ixeddem bla lekwaɣeḍ. Yeɣli deg uxeddim dɣa yerna ɣer uletma-s Samiya, ad mwanasen deg uxxam. Wama taqsiḍt n Malek, tettara tamurt d tamaggert. S wallen-is i yeẓra taccmat deg unaray n unemhal dɣa d tin i d ssebba n uqecceɛ-ines seg umahil. Asmi icetka ad isuter azref-ines, ssbaben-as tid ɣef ur yebni. Lɛar yexdem umɛellem, ḍlan-as-t i netta.
Taggarayt
Amyaru Mass Sidɛli Lahdir, yulles-aɣ-d deg wungal-is ɣef twacult n Ɛemṛan iweqqɛen deg uɣesmar n tmurt isetten arraw-is. Taqbaylit, yesemres umeskar d tin n yal ass, s kra n yimeɣri yessnen ad iɣer taqbaylit, ad yegzu taḥkayt. Sya ɣer da, yessekcem-d awalen i d-yennulfan deg yiseggasen-agi ineggura am Agerdas, azref, tadamsa, aɣsur … Ameskar yessen amek i ten-id-isekcam akken ur ttilin ara d aɛekkir i yimeɣri. Ɣef waya, awin yufan deg tira-s, ad yesnerni asekcem n wawalen-agi imi dayen kecmen deg umawal n tutlayt. Imyura yewwi-d fell-asen ad ten-sidfen deg yiḍrisen-nsen. Deg ungal, banen-d tlata n yisental igejdanen, amezwaru icudd ɣer unegmu imi amdan ilaq ad yeddu d zzman, ad yewwet amek ara d-yawi amur uqbel ad ifat lḥal. Am tlemẓit am yilemẓi, ilaq ad adfen deg tmetti neɣ ad d-grin d ileḍ tettɣunzu tmuɣli.
Asentel wis sin d ilmeẓyen yettaǧan aɣerbaz akken ad ksen laẓ-nsen. Ur ttɣunfun axeddim, ddeqs seg-sen ttuɣalen d ixemmasen ɣer yimɛelmen. Asentel wis krad yesɛa ugar n lmizan deg wungal-agi d lbaṭel akked tejɛal. Bab n udrim ur t-tettawi lqaɛa ayen iɣef yesers afus-is ad t-yawi. Yekkes sser, iḥemmeǧ izerfan, isexreb tirga i yilmeẓyen armi ttmennin lmut wama tudert rẓaget. Imeɣri mi ara yekker i tɣuri n wungal « Tamurt yeččan arraw-is » lbenna n tɣuri ur d-tettas ara deg yisebtaren imenza, Mass Sidɛli izuzur tizeḍt seg uḥric ɣer wayeḍ. Sya ɣer taggara ad yeqqed imeɣri taḍfi-ines, taḥkayt ad teǧǧ deg-s ccama.
Belaïdi Lyes