I lmend n teẓrigt tis mraw ṭam (18) n tfaska n tmedyazt tamaziɣt, tberreḥ-d tddukkla tadelsant Adrar n Fad s wulɣu i yimedayazen d tmedyazin i iran ad kkin s yisefra-nsen i d-snulfan. «S tumert ara d-tberreḥ tddukkla tadelsant Adrar n Fad s useqleɛ n Tfaska taɣelnawt tis mraw d ṭam (18) n tmedyezt tamaziɣt d tajmilt i Dda Lmulud At Mɛemmer! (…) », d kra i nezmer ad nɣer di tazwara n wulɣu-nni.
Ayen yerzan tikkin, ilaq ɣef yimedyazen ad aznen kraḍ (3) n yisefra-nsen imaynuten, s sin n yimedyaten i yiwen, uran s tira n tmaziɣt tamirant s wallal n uselkim, γer tansa-a : Tiddukkla tadelsant Adrar n Fad, cidex 3, BP105. Taregragt (06044) Ayt Smaɛel, Bgayet. Neɣ ɣer yiznil alikṭrunan (imayl): acafdz@yahoo.fr, aya send azemz n 26 deg wayyur-a n furar ideg nella! Daɣen, ilaq ad d-teddu deg ukaram n tikkin tikkest n uzmam n tlallit n yimekki, uṭṭun-is n tilifun d tansa-s.
Am wakken i yewwi-d ad yesεu ugar n 18 n yiseggasen deg leɛmer-is. I wid yebɣan ugar n yisallen γef usaḍuf agensan n umsizwer neɣ ɣef tfaska s umata, zemren ad siwlen ɣer wuṭṭunen-a n tilifun: Til/Fak: 034 39 00 90. Amafus: 05 41 29 41 52. Si tama n umsizwer mucaɛen, ssaramen yiɛeggalen n tddukkla tadelsant Adrar n Fad ad yili waṭas n umaynut ɣur yimedyazen d tmedyazin, imi gar yiswan imeqqranen n tfaska-a d asnulfu akked uwenneɛ n uswir.
Ad d-nesmekti d akken ttiɛad n tfaska-a, ad d-yezg akked taggara n meɣres i d-itteddun, ara d-yeɣlin d yimuras n yinelmaden. Ugar n umsizwer n tmedyazt, yetturaǧu ad n-yili ula d win n tullisin deg uḥric-is wis sin n tmenna, imi aḥric n uceyyeɛ n yiḍrisen yettwamdel yakan di duǧember 2019. Daɣen, ad yettunefk ass-n warraz Kaysa Xalifi n usideg, di teẓrigt-is tis snat.
M. K.