Macahu γef lbaṭel yeḍra d yilmeẓyen n leqbayel, macahu γef yidamen yuzlen am yisafen, macahu γef tyemmatin i ḥeznen d tullas yejlen. Annect-a merra s laḥkkem n udabu amesbaṭli. Ṛeṣṣan izuran-nsen, ṭfen-aγ taqacuct s tizelgi, s lexda&epsilon,; bγan tilelli akk d tidett a ten-t-γum tagut, bγan a d-ẓẓun rrebrab deg ulawen n yemdanen. Ḥḥeq ayen yuran ar d-iεeddi, d lbaṭel yeḍran d weqbayli, a kra n win izerεen kra a d-yečč deg-s. Ihi wid izarεen lbaṭel iḍelli ass-a yemγi yurew-d times, times a ten-t-ṣerγ. Neẓra merra acḥal yeγlin deg ilmeẓyen, wid yuggin ddel d lbaṭel. Mači yiwen mači sin, nelḥaq γer 126 imeγrasen, yerna tuget seg-sen d inubiyen. Ul yejraḥ ma d ttasa γer daxel i tezza. Σelmen s lbaṭel yeḍran i tmurt, dγa, kren-d yelmezyen-agi, wid yugin lεar, wid yugin ddel d lbaṭel. Walan dakken zzerb n yizerfan ksen-ten yeεdawen n tmurt, wid yeṭṭfen taqacuct s tzelgi, s lexde&epsilon,; syen ttḥettimen fell-aγ ayen ur nebγi, bḍan-aγ am ibawen γef lluḥ akken a d-qqimen ilebda deg udabu. Ihi, sekra n win γef iyeshel walluy, ulaqrar tettrajut trusi. Ass-mi wallan yelmeẓyen n leqbayel, d akken imcumen-agi bγan a d-γeḍlen aγalad n lḥerma, bγan a d-rẓẓen tiseγlit n nnif d ttrugza, wallan d akken imcumen-agi ṣawḍen tamurt γer lmuḥal, εeddan tilas s waṭas. Rruḥen a d-ccetkin akken a d-wwin izerfan-nsen, mugren-ten-id s rṣaṣ, γas akken qessiḥ-t fell-asen degnitt, qublen rṣaṣ s yedmaren, qeblen ar d-rẓen ula ar d-kknun, uggin awexxar γer deffir, bγan a d-rren asefreg n lḥerma, duklen afus deg fus, ttlen deg yiwen ubernus, den s yiwet n tduli. Ṣuγen i tidett, yal aqbayli anda yella yerra-d i teγri n tegmatt, maca adabu s yir udem i γ-d-muggren, acku ẓran d akken imdanen merra faqqen s texnanasin xedmen, iban-d wayen i srewten acḥal iseggasen-aya, dγa εewqen amekk ar d-xedmen. Syen zerεen rṣaṣ nγan acḥal d ilemẓi, γilen a d-susmen neγ a ten-segden akken a d-ẓẓlen ilebda deg udabu mebla lfeyda. Maca ilmeẓyen ur brin-ara i tilla, sεan tabγest swayes mugren tugniwin yuεren, ḥṣan d akken annect tebγu teḥreṣ yiwen n wass a d-teqqers. Teqqers ass n 18 yebrir 2001, tafsut-agi taberkant a d-teqqim deg umezruy ilebda, d asmekti u damedya i tsutiwin i d-itedun. Ilmeẓyen n leqbayel uran amezruy-nsen s ufeggeḍ n yidim, amennuγ-agi d win i d-yerran leqdar i tmurt n leqbayel, d win i d-yeglan s kra n tγawsiwin timaynutin, amedya d tamsalt n tutlayt n tmaziγt i yuγalen d tutlayt taγelnawt, u mazal lxir γer zdat, lxir-agi a d-yilli s tdukli d tegmatt.
Islam Bessaci