I lmend n wannect-agi, heggan-d ahil d anesbaɣur i d-yellan, ass-nni n ssebt-agi deffir-nneɣ, 3 meɣres 2018, deg temkerḍit n tɣiwant-agi. Dɣa ɣef 09h00 n ssbeḥ, i yebda leqdic-agi s wudem unṣib, sɣur uselway n tɣiwant n Illula Umalu, syin ɣer-s, ddeqs i d-yemmeslayen ɣef leqdic-agi adelsan akked wansay-a aqdim. Bdan ahil-nsen, s kra n temsikniyin, yecban tin n tgella neɣ lemwakel n zik (abiṣar, ameqful neɣ tafurut, seksu…), tin lfeṭṭa akked tin n tqendurin n Leqbayel, afexxar neɣ talaɣt. Tella daɣen temsikent n yidlisen n tmaziɣt, am wakken daɣen i llan kra n yimura ɣef lmendad n usenzi s ubuddu n yidlisen-nsen.Ɣef 9h30 n ssbeḥ, tella-d talilt (chorale) i d-yewwin kra n tezlatin s teqbaylit. Syin ɣer-s ɣef 10h00, yella-d usarag n umaru d umnadi deg uḥric n yidles d tutlayt tamaziɣt, Mass Rachid Oulebsir, i d-yewwin awal ɣef usentel-agi “Amager n tefsut ɣer yimaziɣen”. Mi yekfa usarag-agi, suffɣen arrac imecṭaḥ ɣer yiḥerqan d yigran, megren-d timeqqunin n yijeǧǧigen, yerna qublen tafsut s wudem yennecraḥen. Ma ɣef 11h00 n uzal, ḍrant-d snat n temsizzliyin, yiwet n tmedyazt (gar usefru akked ucewwiq), tis snat deg usewwi n arkut (plat) igerrzen. Syin akkin, ɣef 12h30 kemmlen ahil-nsen, s tɣuri n tmedyazt d yisefra, kra n ccnawi sɣur yiwet n terbaɛt n yilmeẓyen…atg. Ma ɣef 13h30 n tmeddit, seknen-d amek i d-tettili tmeɣra n zzwaǧ zik-nni, tin ɣur-s, ɣef 15h00 n tmeddit, tella-d tukci n yigerdasen n usebɣes i wid yettekkin deg leqdic-agi. S wakka ihi, i d-smektan Wat Illula Umalu ansay-agi amaziɣ aqbur, i xeddmen medden yal amenzu n tefsut deg leḥsab n yimaziɣen. Bɣan daɣen deffir n leqdic-agi, ad ẓẓun tikti n useḥbiber ɣef unsay-agi s wuzzig neɣ ɣef wansayen n lejdud-nneɣ s umata.
Adaoun A.