La Gazette de l’étudiant d tasɣunt tamezwarut n tesdawit Mouloud Mammeri n Tizi Uzzu. Suffɣen-tt-id yinelmaden yeqqaren tussna n yisallen d teywult deg Tamda, aya s lmendad n kra n yiselmaden d yimḍebbren n tesdawit, ɣef wakken i d-nnan. Gar-asen, yella Ahmed Tissa, Taher Bentounès, Samia Mammeri d wiyaḍ. Ttawil-a n tɣamsa i yesɛan assaɣ srid d temsirin n wahil asdawan n yinelmaden i yeqqaren deg uḥric n yisallen akked teywult, yettwaru s tlata n tutlayin : tafrensist, tamaziɣt akked taɛrabt. Deg uṭṭun amezwaru 00, wwin-d awal s teɣzi ɣef yal tama i yeɛnan tasdawit n Tamda s umata. I lmend n waya, gan wid yuran deg-s tidiwenniyin i Mass Tahar Bentounès, yiwen gar yimḍebbren n tesdawit akked Mass Ahcène Mamèche i d-yemmeslayen ɣef tudert n yinelmaden deg tesdawit, ladɣa, s tama-agi n tguni Am wakken i d-yella yiwen n uglam n uwudam n temḍebbert-nniḍen, Massa Samira Mammeri. Ad naf,diɣ, deg tesɣunt La gazette de l’étudiant iḍrisen i icudden ɣer leqdic n yinelmaden deg tesdawit n Tamda, ama seg uḥric n yidles neɣ n waddal. Si tama n unadi deg unnar, rran yinelmaden lwelha-nsen ɣer yiminigen n tama-agi n unẓul akked tḥuna n Tizi uzzu. Seg tama n yidles d tẓuri s umata, uran-d yinelmaden ɣef kra n yiwudam mechuren yecban icennayen Matoub Lounes d Ait menguellet, amnadi Mouloud mammeri, aneɣmas ameɣnas Tahar Djaout akked Abderrahmane Bouguermouh i d-yessefɣun asaru amewaru s teqbaylit, mebla ma ttun aselmad n tesdawit Pr Brahim Salhi. Qublen yimḍebbren akked yinelmaden n tesdawit n Tizi Uzzus tasɣunt-a s lferḥ ameqqran imi tikkelt tamezwarut i d-yella leqdic am wa deg tesdawit. Aya, d iseɣ ara as-yernun ccan , ɣef wakken i walan. Afud igerrzen i yinelmaden d yiselmaden, teɣzi n leɛmer i tesɣunt La Gazette de l’étudiant.
Hocine Moula