Di zzik lwilaya n Tizi Wezzu ur d-ufrar ara s cbaḥa d tezdeg. Ladɣa tamdint-is. Din i tekker txerxert. Mi truḥeḍ ad tafeḍ icekkaren n zbel zdat n yexxamen, tiḥuna, rrasṭurat,…Deg ccetwa, afrasen yennejmaɛen deg tɣemyar, ad ten t-afeḍ yak lxin. TTfaɣen-d deg-sen waman rkan. Skud yekkat fell-asen ugeffur, skud ad ttiriden. Imesberdan ilaq-asen ad ḥṣun anda ara sersen iḍarren-nsen. S ya d afrasen n lɣaci, sya d aman-nni ifuḥanen d-yettqudduren seg-sen. Icekkaren n iḍumman zgan llin iqemmac-nsen ɣer tegnaw. Uɣalen d lɛec n iɣerdayen lak d igerlelluyen d waṭas n ibelɛac nniḍen yettafen tiram-nsen deg tarbut n warṣaḍ ( afrasen). Iḍan d yemcac, ula d nutni, ttwaɛerḍen ad ccen amur-nsen. Iɣerṣiwen-agi, ttafen deg iḍumman n temdint imensi igerzen, ladɣa wid id- ṭeggiren ṣḥab rrasṭurat. Mi wḍen ɣer wemkan anda ara d-eqden iɛebbaḍ-nsen, imcac d yeqjan, ad as-tiniḍ yeffeɣ-iten laɛqel mi walan lxir n Ṛebbi, ad ɣlin uglan tuɣmas. Icekkaren n wafrasen, akken llan ad tt-wacergen, ayen yellan di lqaɛ ad d-yeffeɣ ɣer lqaɛa. Kullec yettwagzer. Kullec ad d-ittwakfel. Mi rwan, imcac d yiḍan, mkul yiwen ad yaweḍ axxam-is. Imezdaɣ, yeffeɣ wul, mi d d-ekren ṣbaḥ, ad d-ernun iḍumman-nniḍen ɣer widak yellan yuɣ lḥal ttwamɣen deg iberdan. Llan kra ur ttaken ara laɛtab i tarwiḥt, mi tecur tcekkart n wafrasen ad tt-id-zarw ɛen di ṭṭaq. Wiyyaḍ mi d-ɛeddan s ṭunubil ad ten-twaliḍ ttzarziren-d iculliḍen n wafrasen s daxel. Deg unebdu idurar n iḍumman, yettaṭṭafen amekan di yal tiɣmert n temdint n Tizi Wezzu, seɛɛuyen inebgawen nniḍen. Igelfan n nnamus d yizzan. Ineggura-agi ttexlaqen d luluf. Ma d rriḥa ulac d acu ara d-nini fell-as. Imesberdan, ma ur sudden ara anzaren-nsen m’ar ɛeddin zdat n imekwan yettwacemten s wafrasen, zemren ad fesxen.
Im ɣaren, timɣarin, ilmezyen, tilmezyin, arrac imecṭaḥ, ɣran neɣ ur ɣrin, kif kif. Ma ccan kawkaw, ad brun di tlemmast n webrid i tcelwiṭ-nni, ma ccan taḥlawatt ad ḍegren i lkaɣeḍ anda ufan. Hder neɣ qim, imdanen, xas akken ḥṣan d akken iḍumman-agi ṭeggiren kan zemren ad sen-d-awin aṭṭanen um’ur yettaf umejjay dwa, maca mazal ur rrin ara tilas i yir ttrebga-agi. Ayen yessagaden aṭas d asiwseɛ n « yedles-agi » ara yessersen tiyita meqren i tezmert n wemdan, imi « zhir yewweḍ-ed ɣer tudrin”.
Zenia T.