Imezdaɣ n taddart n Tamra, i yettabaɛen ɣer tɣiwant n Laɛǧiba, i d-yezgan ɣef 35 ikilumitren n ussamer n waɣir n Tubiret. Ssutren deg yiɛeggalen n lwilaya ɣef uqerruy-nsen lwali akken ad d-gren iman-nsen ad asen-ksen lḥif d yiɣeblan ittidiren acḥal d aseggas, ssebba n lexsas n waṭas n wallalen n tudert yelhan, am lexsas n waman n tissit. I yeǧǧan imezdaɣ-a ad ṛwun lḥif ɣef unadi ansi ara ten-id-awin, almi iten-yerra lḥal ad d-krun isitiren n waman s wazal n 1000 yidinaren. Annect-a d ayen i aten-yesserfan imi ttwalin dakken abaraǧ n waman ur yebɛid ara s waṭas ɣef taddart-nsen, maca imḍebren n tɣiwant akked lwilaya ur xdimen ara lwajeb-nsen xas akken ccetkan-asen acḥal n tikkal. Rnu ɣer waya, ssuturen daɣen ad asen-d-awin lgaz n temdint acku rewwun lḥif ladɣa deg wussan n cctawi iwaɛren ɣef unadi n teqraɛtin n lgaz i yettalin deg ssuma almi 700 idinaren, tikwal ur tettafeḍ ara. Seg tama-nniḍen, wekkden-d belli uguren-a d cwiṭ seg wayen i ttidiren imi taddart-a ur tesɛi ara imukan n wurar am inurar d tzeɣwa n waddal i yilmeẓyen iwakken ad ksen lxiq ɣef yiman-nsen, rnan daɣen ssutren trissiti n ubrid akked tikci n lxedma i yilmeẓyen i yerwan laɛtab ɣef unadi n lxedma. Ihi anect-a yeǧǧa imezdaɣ-a ad sɛun asirem deg yimḍebren iwakken ad d-rren lwelha-nsen ɣer taddart-a i yettwattun acḥal d aseggas.
Bousbaine S.