Lhan yinelmaden n tesdawit n tubiret ass-nni n ttlata, 15 tuber 2019, akken ad d-inin ‘’Ala i tefranin n 12 duǧember i d-iteddun’’, ‘’I rrwaḥ n yizamulen n unagraw’’. Am wakken i ṭṭalaben, diɣ, ‘’Asuffeɣ n yimeḥbas n rray’’. Ffyen-d yinelmaden n tesdawit Akli Muḥend Ulḥagǧ akken uɣen tannumi s umgired n tektiwin d wannayen iwraɣen, izeggaɣen d izegzawen. Dduklen-d akken ad d-inin ulac tifranin di yir tignatin yecban tigi. Ssuturen daɣen aqlaɛ n udabu seg yiẓuran imi dayen yeqqur. Ur ttun ara diɣ amennuy-nsen mgal tuddsiwin imi, ɣur-sen, tigi squcdent-d seg udabu. ‘’Ihi, ad ruhent akken ara iruh uẓar-nsent, akken ad teǧǧuǧeg tesdawit’’, i iwala yiwen unelmad. Ṭṭuqten yinelmaden yeddan si tesdawit armi d lwilaya akken ṭṭuqtent tektiwin-nsen. Ad nerr tamawt d akken ɣer tama n yinelmaden, lḥan kra n yimezday d imeɣnasen akken ad ffken afud i yilelliyen n tubiret. Tella-d tikli deg tegnatin igerrzen nezzeh ɣas ulamma aṭas i yelḥan deg-s s wulɣuten i yessawalen i ubeddel, tugdut d tlelli. Ṭṭerḍiqent tuyɣac n Maɛtub, Ideflawen d Uleḥlu amzun d Ǧerǧer s timmad-is i icennun.
Nisma Tigrine